Tottenham stadium-ah Fury inhnek dawn

British boxer rothap Tyson Fury leh Arslanbek Makhmudov te chu April 11, 2026-ah an inhnek dawn a, an inhnekna hmun tur tichiang tawhin Tottenham Hotspur Stadium, London-ah an inhnek dawn. Netflix-ah Fury te inhnek hi pek chhuah a ni ang.

Kum 37 mi Fury hi kum khat chhung a chawl tawh a, a inhnek hnuhnun ber chu December 2024-a Oleksandr Usyk a hneh loh kha a ni a, a chak loh hnu lawk hian boxing a chawlhsan thu a puang. Mahse Fury hian January khan a lo let thu a puang leh a, Russian boxer Makhmudov nen an inhnek dawn tih a chiang ta.

Fury hi a boxer ropui tak angah ngaih a ni a, chutihrualin a hmachhawn tur Makhmudov hi zuam sual theih a ni. Kum 36 mi Makhmudov hian a career-ah match 23 khel tawh aṭangin vawi 21 a chak tawh a, vawi 19 a khingpuite a knockout.

Promoter hriat hlawh Frank Warren pawhin, "Tyson Fury rawn let hi a awlsam dawn lo a, Fury hian fighter ṭha tak hmachhawn a duh a, Makhmudov hi fighter ṭha tak a ni a, knockout ratio pawh a nei ṭha hle. Makhmudov nen inhnek hmuhnawm tak min hmuhtir ka beisei," a ti ve bawk.

Fury pawh phur hle, Instagram lamah Gypsy King hian a insawizawi lai tarlangin, "Hetianga ka hlim lohna chen hi ka hre tawh lo, kan inhnek turin min tiphur tawh hle a ni," a ti.