Forest enkawl tur Vitor Pereira

Sean Dyche an ban hnuah Nottingham Forest chuan an manager thar atan Vitor Pereira an lalut a, thla 18 cham turin an inrem. Vitor Pereira hi tun season-a Forest enkawl tu palina chiah a ni.

Forest hi Sean Dyche-a hnuaiah an che ṭha lo a, point 27 hmuin table-ah 17-naah an awm a, an match hnuhnung 10-ah vawi hnih chiah hnehna an changin relegation zone-a awm West Han United aiin point thum chiahin an sang zawk.

English manager Dyche hnuaiah club lian an ngam nghal a, an insiamrem dawna a lan laiin an daih rei lo a, result ṭha an neih chhunzawm theih loh avangin ni 114 hnu lawkah Sean Dyche pawh an ban leh ta a ni.

Nikum October khan Sean Dyche hian Nottingham Forest hi a zawm a, English coach Dyche hma hian Forest hian Tottenham coach hlui pahnih Nuno Espírito Santo leh Ange Postecoglou te an lo ruai tawh a, result ṭha an neih theih loh avangin an ban ve ve.

Sean Dyche an ban rualin Wolves manager hlui Vitor Pereira hming a ri nghal a, nikum November-a Wolves-in an ban tak Pereira hi Forest enkawl tura hming langsar ber a ni a, Sean Dyche ban a nih hnu ni thumah Pereira hi an lalut ta a ni.

Portuguese coach Pereira hnuaiah nimin khan training hmasa ber an nei a, Pereira hnuaiah relegate loh chu an thil tum lian ber a ni dawn. Ningnai zan hian Vitor Pereira hnuaia match hmasa ber atan Fenerbahce nen Europa League playoff-ah an inhmachhawn dawn a, February, 22-ah Liverpool an mikhual leh nghal dawn bawk a, Pereira tan a awlsam dawn lo.