Nadal-a'n Kyrgios a hneh

Australian Open-ah seeded number 1 Rafael Nadal-a'n Roger Federer leh Novak Djokovic te hnung zuiin nimin khan Nick Kyrgios chu 6-3, 3-6, 7-6, 7-6 in a hneh a, quarterfinal a lut.

Spanish tennis player hian hnehna chang turin darkar thum leh minute 38 a mamawh a, major tournament-ah vawi 41 quarterfinal luhna niin Jimmy Connors a nih rual chiah. Hemi kawngah hian Nadal-a chungah Federer leh Djokovic te chiah an awm.

Nimin inkhelah hian Aussie player service nei ṭha Kyrgios-a'n aces 25 zet nei mah se Nadal hneh nan a tawk lo. Player ṭha pahnih an intum tawk a, Nadal hian set linaah hnehna a chang nachungin set hnuhnung pahnih la turin 'tiebreak' a mamawh ve ve.

Inkhel banah Rafael Nadal chuan, "Nick hi a rilru put hmang a dik chuan tennis tan hian thil ṭha tam tak thlen turin theihna a nei tih a chiang. Hei vang tak hian a theihna sang tak hmang ṭangkai zel turin ka fuih duh a ni," tiin boruak ṭha lo a neihpui tawh ṭhin Kyrgios chungchang a sawi.

Kobe Bryant chungchang sawi zuiin Nadal chuan, "Zing kan tho a, chanchin ṭha lo kan hre nghal. Kobe Bryant hi infiammi ropui zinga mi a ni a, zah a phu. A khelhpui ṭhin Pau Gasol hi ka ṭhian ṭha tak a ni a, hmasawn duha a thawhrimzia min hrilh ṭhin. He chhiatna hi theihngilh kan duh a, Kobe Bryant erawh kan thinlungah a cham reng ang," tiin basketball legend a ui thu a sawi.