FA Cup inhmachhawn tur a chiang

English football-a inelna ngaihhlut hlawh, FA Cup fifth round chu draw neih a ni ta a, quarterfinal luh inchuha inkhel tur zingah Newcastle United leh Manchester City inhmachhawn tur chu 'hot' ber tura ngaih a ni.

Premier League, FA Cup, League Cup leh Champions League-a champion tum Arsenal an vannei a, quarterfinal inkhelah League one club Mansfield Town an hmachhawn dawn - a harsa lo tura ngaih a ni.

Chelsea-in Championship club ngaihven hlawh Wrexham an lenchilh dawn a, he inkhel hian mipui ngaihven a hlawh dawn - Wrexham hi Hollywood stars Rob Mac leh Ryan Reynolds te ta an ni a, club neitute avang ringawt pawhin an lar hle.

Liverpool-in last 16-ah division hniam lam club hmachhawn an châk ang tih a chiang a, mahse, anmahni ang thoa Premier League club Wolverhampton Wanderers an lenchilh a ṭul dawn.

Wolves hian Premier League table mawngphah luah mek mah se, tournament result dang hmanga an mualphona thaibo an duh dawn a, hmachhawn an awlsam lo ang.

Hetihlai hian fourth round khel tur zinga mi, Port Vale leh Bristol City te chu inkhelh hun tura ruatah ruah surin khelmual a tihbuai avangin an inkhel thei lo a, an inkhelh hun sawn a nih avangin an la inkhel ve lo.

Club pahnih hi March 3 zanah an inkhel ve dawn chauh a, an pahnih inkhela chak zawk hian Sunderland an mikhual ang. FA Cup fifth round-ah replay match khelh a ni dawn lo a, minute 90 chhunga chak zawk an awm lo a nih chuan extra time khelh a ni ang a, chak zawk an la awm loh cheu chuan penalty hmanga chinfel a ni ang.

FA Cup-ah hian fifth round aṭangin VAR hman ṭhin a ni bawk a, fourth round-ah ringawt pawh khan VAR awm se, goal-a pawm tur, pawm loh a awm nual.