Atletico winger Nicolas a inhliam

Rayo Vallecano laka mualpho hlim Atletico Madrid-in chanchin lawmawm lo an dawn belh a, Vallecano lakah winger Nicolas Gonzalez chu inkhel tluan mah se, a inhliam thu an puang.

Atletico hian an player hian a malpuiah hliam a neih thu hi sawiin, a chawlh chen tur erawh an pholang lo a, Spanish media ṭhenkhat chuan Finalissima pawh a khelh lo mai theih thu an sawi avangin a chawl rei dawn niin a lang.

Finalissima hi Europe leh South America champion ramte inelna an ni a, kum 1985 khan khelh ṭan niin, kum 2022 khan thar thawh leh a ni - kuminah hian Spain leh Argentina an inkhel dawn.

March 27-ah Finalissima hi khelh tur niin, Qatar-ah Spain leh Argentina hi an inkhel dawn - Nicolas Gonzalez hi Argentine niin, ram tan match 48 ngawt a khel tawh.

Atletico Madrid tan pawh Argentine winger chhawr theih loh hi chânna a tling. Diego Simeone team hian direct-a Champions League last 16 an inpetkai zawh loh avangin zanin dar 1:30-ah UCL last 16 playoff an khel dawn a, Club Brugge chu khualmualah an lenchilh dawn.

Spanish club hi chak tura rin hlawh zawk ni mah se, chak chiang saa dah erawh a rem bik lo - tun hnai an result aṭang ringawt pawhin hriatthiam an harsa!

Kar hmasa lawk khan Copa del Rey semifinal first leg-ah Barcelona chu 4-0 in an sawp a, mahse, Pathianni zan khan La Liga inkhelah Rayo Vallecano chu 3-0 in an ngam lo zui - mualpho khuh nan zaninah chak an mamawh.