Spurs assistant Heitinga a chhuak

Tottenham Hotspur assistant coach John Heitinga chuan ni 33 chiah London club-ah hun a hmang hman tihin a chhuak a, Spurs-in coach Thomas Frank an ban vanga chhuak a ni.

Spurs hian an coach Thomas Frank chu thla riat chauh an thawk ho hman tihin, kar hmasa lawk khan an ban a, Juventus head coach hlui Igor Tudor chu season tawp thlenga coach lailawk turin an la lut zui.

London club hian Heitinga ban ve lo mah se, West Ham leh Liverpool assistant coach hlui hian Tudor-a coaching staff zinga awm ai chuan chhuah a thlang ta zawk a ni.

Heitinga bakah hian Frank-a'n Brentford aṭanga a chhawm assistant coach pahnih Justin Cochrane leh Chris Haslam pawhin Spurs an chhuahsan a, hetihrual hian Frank ruala lakluh, set-piece coach Andreas Georgson leh individual development coach (IDP) Cameron Campbell te erawh an cham dawn thung.

Kum 47 mi Tudor hi assistant coach Ivan Javorcic, physical coach Riccardo Ragnacci leh goalkeeping coach Tomislav Rogic ten an zui bawk a, goalkeeping coach thar awm mah se, he hna chelh mektu Fabian Otte pawh Spurs-ah hian a la awm dawn tho.