La Liga-ah Barcelona an tawlhthlu

Thawhṭanni zan khan Barcelona chuan Girona an lenchilh a a, Barca hian an chak loh chuan an hmelma Real Madrid-in hma an hruai tlang dawn tih an hre reng a, mahse an chak ta chuang lo, an mikhualna ramah 2-1 in Girona an ngam lo. Barca-in Pau Cubarsi hmangin hmahruai hmasa a, Giron-in Thomas Lemar leh Fran Beltran te hmangin an chhanglet.

Estadi Montilivi-a inkhelah Barca an chungung zawk a, Raphinha-a'n chance duhawm vawi thum lai nei mah se goal ban a pet per chu a hlauhawm ber a ni pha ṭawk. Rawlthar duhawm Lamine Yamal chacne a nei nual bawk a, Yamal a vannei tawk lo a, keeper chauh a hmachhawn hnuah a pet goal thei lo.

First half hun pek belha Dani Olmo penalty hlawhchhuah chu goal ban pet per nan hmangin goal-ah a chantir thei lo bawk a, Yamal tan zan chhinchhiah tlak a ni lo. Barca an vanduai reng lo a, minute 59-naah Jules Kounde cross chu Cubarsi-a'n a tauh lutin a team hma a hruaipui a, Girona keeper Paulo Gazzaniga-a'n a ban pha lo. Barca-in inkhel an thunun zawk avangin an chak mai a rinawm hman.

Mahse goal an chhuah hnuah Girona ben harhin an awm a, goal an chhuah aṭanga minute thum hnu lawkah Vladyslav Vanat-a cross chu vengtu nei lo Thomas Lemar-a'n hnai tak aṭangin a pet goal a, an siphurh a sut. Barca defender ten Lemar an veng ṭha tawk lo.

Mualneitu an hlauhawm chhunzawm a, Lemar-a goal khung tur siamsaktu Vanat leh Joel Roca ten chance ṭha an nei a, Barca keeper Joan Garcia-a'n ṭha takin a lo dang a, Garcia-a'n an mualpho lutuk tur a veng a tih theih a, Barca an vannei tak zet.

Girona-in goal an khung ta nge nge a, minute 86-naah Joel Roca-a'n Fran Beltran tan a pe a, Beltran-a'n goal kilah tak a pet lutin chakna goal a khung. Barca-in a chhanletna an neih tawh loh avangin a tlawm zawkah an ṭang. Girona tan bench aṭanga luhtir Roca-a'n hun tawp dawnah red card hmu mah se a khel ṭha hle.

Catalan club hian point 58 hmuin pahnihnaah an tla a, hmahruaitu Real Madrid chu point hnihin an phak lo. Barca hi Spanish Super Cup-ah champion tawhin Champions League-ah an la dam bawk.

Copa del Rey-ah an la dam bawk a, mahse Copa del Rey semifinal first leg-ah Atletico Madrid 4-0 ngawta an hneh loh avangin final lut turin thil mak an mamawh tawh a, quadruple champion ni thei dawn lo mah se treble champion tal nih an duh dawn avangin Hansi Flick-a naute hian Real Madrid lehpelh leh ngei an tum ang.

Chutihrualin Barca hi UCL last 16 an luh chian tawh avangin February thlaah match an nei dawn lo a, thla tharah Copa del Rey khelh chhunzawm a nih dawn chauh avangin tun thla an la hman tur chu league lamah an insawrbing thei ang. Hansi Flick-a naute hian February 22, Pathianni zanah Levante an mikhual dawn a, chetsual nawn an duh tawh dawn lo.

An hmelma Real Madrid erawhin playoff an khelh dawn a, playoff hi second leg nen khelh tur a nih dawn avangin match an ngah dawn a, league lamah nghawng a nei thei a, Barca-in an chetsual hun an chang ve thung tawh dawn. Real hian nizan khan Benfica nen an inkhel a, result kan hre hman lo.