Newcastle-ah midfielder Tonali a hlim

Italian midfielder Sandro Tonali chuan Newcatle United-ah a hlim a, an manager Eddie Howe nen an inkar a ṭhat thu a sawi a, Tonali duhtu club tan hriat a nuam lo ang.

Newcastle hian Inrinni zan khan FA Cup 4th round-ah Aston Villa 3-1 in an hneh a, he inkhelah hian Tonali-a'n goal hnih a khung. Tonali chuan,"Goal hnihna ka khung hnu khan Eddie (Howe) bulah ka kal nghal a, a chhan chu tun hnaiah kan inkar boruakah sawi a awm deuh vang a ni. Mahse kan manager nen nitin kan thawk dun a, kan thawhhona pawh a ṭha hle. Kan inkarah boruak ṭha lo engmah a awm lo a, chu chu team tan a pawimawh ber," tiin manager Eddie Howe nen an inkar a sawifiah.

A hma hun chungchang zawhna chhangin kum 25 mi Tonali chuan, "Dawt sawi ka duh lo a, he hmunah hian kum 10 ka awm duh tih a, kum hnih kum thum hnu leka chhuak leh nih ka duh lo. Mahse hei hi football kalphung a ni a, tunah chuan helai hmunah hian kan hlim," a ti.

Tonali hi tun hnaiah Arsenal leh clubṭhenkhat nen sawi zawm a hlawh a, inbiakna mumal tak erawh kalpui a la awm lo thung. 2023 khan Tonali hian Newcastle a zawm a, match riat lek a khelhsak hnuah pawisa inthapnaa a inhnamhnawih avangin thla 10 chhung inkhel thei lo turin an hrem. Hremna a hmachhawn zawh hnuah Tonali a che ṭha a, Magpies midfield-ah an innghahna ber pakhat a ni.

Newcastle hian zanin dar 11:15-ah Azerbaijan club Qarabag FK nen an inhmachhawn dawn a, Magpies hi tun season-ah league lamah beisei an pha lo a, anmahni ṭantute tihlawm nan Champions League lamah chet ṭhat an tum ang.