Buaina tawk ngun Vini

Real Madrid forward Vini Jr hi tunlai footballer zingah chi inthliarna tawk ngun ber a ni hial ang. Kum 2022 khan Atletico Madrid nen an inkhelh ṭumin Vini hian a vawi khat nan a tawng a, kum tinin chi inthliarna avangin hmuhsitna a tawk ziah.

Benfica manager Jose Mourinho chuan, "Mipui kha a ti thinrimah ka ngai. Amah pawh ka hrilh a, khatianga goal ropui a khung chuan zahawm takin a lawm tur a ni. Chi inthliarna chungchang a sawi pawhin Benfica history-a player ropui ber Eusebio chu mihang a nih thu ka hrilh," tiin inkhelh banah a sawi a, Portuguese manager hian Vini Jr hi a chhan lo.

A pawimawh ta ber chu Gianluca Prestianni thusawi a ni a, a ka hup avangin a thusawi tak hriat a ni lo. Kylian Mbappe chuan, "A hming lam rik tlakah pawh ka ngai lo. No. 25 khan Vini kha zawng tiin a ko a, vawi nga a koh ri ka hria. Benfica player-te pawhin an hria ang," tiin a khelhpui Vini a chhan a, Champions League khel tlak a nih loh thu a sawi.

Benfica winger Prestianni chuan, "Vini Jr kha chi leh chi inthliarna ang zawngin ka ṭawng khum lo a, ka ṭawng a hre sual zawk a ni. Tumah hi ka hmusit ngai lo a, Real Madrid player-te pawh an hriat sual vangin ka chanchin dik lo taka an sawi hi pawi ka ti," tiin a sawi thung.

Santiago Bernabeu-ah Mourinho-a'n Benfica ho thei lo mah se Vini Jr leh Prestianni te inkar boruak vang ringawt pawhin second leg boruak a nung dawn. A tawpa pawimawh ber erawh inkhel vawi hnih zawh hnua a chak zawka ṭan a ni ang.