Odisha-in training nei ve ta

19th February, 2026

Indian Super League club Odisha FC chuan training pawh an neih theih loh reng hnuin training an ṭan ve leh ta a, an khelmual atan Kalinga Stadium an hmang dawn tih a chiang ta bawk.

Odisha FC hian state sorkar nen Kalinga Stadium hmang tur hian inremna an lo nei sa tawh ṭhin a, mahse, an inremna hmasa hi season hmasaah khan tawpin, hun engemaw chen chu an inrem leh lawk thei lo.

Hei vang hian ISL club hian training pawh an nei lawk thei lo a, kar hmasaa an ISL match tur pawh sawn tlai a ngaih phah - tunah erawh training an zawm ve leh ta a, ISL an khel ngei dawn e.

Odisha player ṭhenkhat chuan Thawhlehni khan club hmun an thleng tawh a, niminah thleng thar an awm nual bawk. Odisha-ah hian Mizo player an awm nual a, K. Lalṭhathanga (Puitea), Isak Vanlalruatfela leh Jeremy Zohminghlua te chu an kawl sa an ni.

Anni pathum bakah hian Mohammedan SC aṭangin Vanlalzuidika Chhakchhuak leh K. Lalrinfela (Mafela) te an lakluh belh bawk - Mizo player panga an kawl tihna a ni a, season hmasaa Mizo player awm sa pahnih an chhuak thung.

Odisha nena inhmeh tak Jerry Mawihmingthanga chuan a contract hmang zoin, Kolkata khawpuiah chona thar hmachhawn a tum a, East Bengal a zawm. Hetihlai hian Jerry Lalrinzuala'n season hnih hnuah Odisha chhuahsanin, FC Goa a zawm ve bawk.

Kalinga Warriors (Odisha sawina) hi an coach Sergio Lobera nen inṭhenin, Spanish coach hian Bagan a enkawl tawh a, Odisha erawh Indian coach T. G. Purushothaman kaihhruaina hnuaiah an khel dawn thung.

Kum 46 mi coach hian season hmasa khan Kerala Blasters a lo enkawl lailawk tawh a, kum 2023 aṭang khan Blasters-ah hian assistant coach a lo ni tawh.

Tun season-ah ISL club ṭhenkhatin sum inrenchem an kalpui avangin Indian coach hmang an awm nual a, ISL-a Indian coach an tam ber ṭum tur a ni dawn.

Odisha bakah hian Chennaiyin (Clifford Miranda), Bengaluru (Renedy Singh) leh Mohammedan SC (Mehrajuddin Wadoo) ten Indian coach hoin ISL hi an hmachhawn dawn. Odisha hian February 24 zanah Inter Kashi mikhualin, tun season-a an ISL match hmasa ber an khel ang.