Klopp-a'n United leh Chelsea hnar

Jurgen Klopp-a agent Marc Kosicke chuan German manager chuan Liverpool a chhuahsan khan Manchester United leh Chelsea aṭanga sawmna a hmuh thu a sawi a, "Mahse, a hnar a ni," a ti.

Klopp hian England-ah chuan Liverpool lo club dang enkawl tumna a neih loh thu a sawi tawh a, tunah hian coaching lam hnungchhawnin, Red Bull hnuaiah Head of Global Soccer hna a thawk mek.

Kosicke chuan, "Tun dinhmunah chuan a hnaah hian a tui em em a, coaching lama a kir leh pawh hi ka ring rih lo. Engtik niah emaw chuan, coach nih leh ngei a duh mai thei a, mahse, tun dinhmunah chuan a hnaah hian a hlim tawk hle.

"Red Bull a zawm hma khan USA emaw England emaw enkawlna chance pawh a nei a, Germany pawh kha Julian Nagelsmann la hman lo se chu enkawl theihna chance a sang hle," a ti.

Klopp-a agent chuan sawi zawmin, "Chelsea leh United pawhin an ngaihven a, Liverpool lo chu English club enkawl a tum loh thu a sawi chungin amah rimtu hi chu an awm reng," a ti a, United leh Chelsea chuan Klopp bia anga sawi an nih chu an pha thung.

Kum 58 mi Klopp hian May 2024 khan Liverpool hi kum riat leh a chanve a enkawl hnuah a chhuahsan a, nomawi chawi theih ang zawng zawng chu Anfield-ah hian a chawi kim.

Kosicke chuan Klopp hian Bayern Munich pawh a enkawl teuh hle ṭhin thu a sawi. German coach agent chuan, "Vawi hnih ngawt chu Bayern nen hian kan inhnaih hman hle a ni.

"Kum 2009 khan a vawi khat nan an ngaihven a, mahse, Uli Hoeness-a'n Jurgen a duh laiin Karl-Heinz Rummenigge khan Jurgen Klinsmann a duh tlat thung.

"Kum 2019-a Niko Kovac ban a nih khan mi an rawn dawr leh bawk. A hun lai khan Hansi Flick kha khati tak khan a hlawhtling ang tih tumahin an ring lo," a ti a, Klopp chuan duhtu a tlakchham loh thu a sawi.