Arsenal player hlawh hnem ber tur Saka

Premier League hmahruaitu Arsenal chuan, an player pawimawh Bukayo Saka chu Emirates Stadium-a kum nga dang khelh chhunzawm turin an thlung nghet a, Gunners player hlawh hnem ber an nihtir nghal bawk.

Saka hian Arsenal tan kum 2031 thleng khel turin contract thar hi a ziak a, kar khatah £300,000 a hlawh dawn - Arsenal player zingah heti zat hlawh phak dang an awm lo a, Saka chu Gunners player hlawh hnem ber a ni ta a ni.

Arsenal leh Saka hi contract thar chungchangah kum khat vel chu an indawr tawh a, January khan Saka hian a thuphungin contract pawhsei a rem ti. Tunah chuan a tak takin engkim chinfel a ni ta a, Saka-a'n kum nga dang chu Arsenal tan a la khel dawn.

Tun season-a nomawi pali chawi beiseitu Arsenal hian player engemaw zat chu contract thar an lo ziahpui tawh a, nipui lai khan player pawimawh William Saliba, Gabriel Magalhaes, Ethan Nwaneri leh Myles Lewis-Skelly te chu khaw dang an hawi phal loin, hun rei zawk atan contract thar an lo ziahpui tawh bawk.

Arsenal academy chhuak Saka hian Gunners tih loh club dang tan a la khel ngai lo a, kum 24 mi forward hian a contract a hman zawh meuh chuan kum 30 a hnaih thuak tawh dawn tihna a ni.

Saka hian Arsenal tan inelna hrang hrangah match 296 khel tawhin, goal 77 a khungsak a, assist vawi 78 a nei bawk. Tun season inelna hrang hrangah match 33 khel tawhin, goal sarih a khung a, assist vawi sarih a nei bawk.

Mahse, England tan vawi 48 inlana goal 14 khungtu hian Gunners tan nomawi hlu tham deuh chu FA Cup chiah a la chawi a, Arsenal fan-ten tun season-ah Saka hoa EPL nomawi chawi ngei an inbeisei ang.