Chhuanlam a awm hman lo - Spurs boss

Tottenham Hotspur coach thar Igor Tudor chuan chhuanlam siam tura hun an neih loh thu a sawi a, a club thar chu result ṭha tak hlawhchhuahpui turin theihtawp a chhuah dawn.

Spurs hian beiseina sang tak nena an lakluh, Brentford coach Thomas Frank-a hnuaiah beisei an phak lo a, Premier League match 12 chiah khelh tur awm tawhah relegation zone aṭanga an himna chu point nga chauh a ni.

Tudor chuan, "Kan hmabak a awlsam dawn lo tih hre saa lo kal ka ni a, chhuanlam siam turin hun kan nei tawh lo. Tun dinhmuna Spurs awmna hi tumahin an pai dam thei lo a, Spurs fans tana a harsatzia pawh kan hria," a ti a, London club khaichhuah leh ngei a tum.

Tudor hian club 10 chuang a lo enkawl tawh a, kum 2013 khan Austrian club Hajduk Split chu Croatian Cup-ah champion vein, nomawi chhuan tur dang erawh a nei lo.

Season tawp thleng atana contract ziaktu Tudor hian result ṭha hlawhchhuah nghal tum viau mah se, player 11 ngawt chu inhliam vangin an chawl mek a, kum 47 mi coach tan a awlsam nghal dawn lo tih a chiang.

Tudor chuan, "Player inhliam kan ngah em avangin kan hmabak hi a ko hle. A pawimawh ber chu team tana theihtawp chhuah phawt mai hi a ni. Ka ngaihdanah chuan he team hi an inrintawk a ngai a, an huaisen a ngai tel," a ti.

Hetihrual hian Tudor-a hmabak a hautak chho dawn hle. Spurs a enkawl hnua a match hmasa berah Arsenal a hmachhawn dawn a, London Hmar Veng club pahnih hi inhal tak an nih avangin boruak a sang ṭan hle.