Muguruza hnenah wildcard

February 17 aṭanga khelh tur Dubai Tennis Championships 2020 atan Garbine Muguruza chu duhsak takin wildcard pek a ni a, player langsar dang US Open champion Bianca Andreescu erawh a hliam a la dam chian loh avangin a inhnukdawk.

Andreescu hi season hmasa tawpa a thiam pariatte inelna WTA Finals an khelh ṭum khan a khup a hliam, a hliam vang hian kuminah pawh season a la hmang ṭan ve thei lo. Auckland Classic leh Australian Open 2020 aṭang te pawhin a lo inhnukdawk tawh a ni.

Canada tana Fed Cup pawh khel thei lo Andreescu chuan, "Dubai lama ka inlan ve thei lo tur hi a pawi ka ti hle, nitin hian hmasawn zel mah ila ka hliam hi a la dam fel lo. 100%-a ka inpeih hma chuan inkhelh luih chu ka tan a ṭha lo zawk," tiin a sawi.

Grand Slam vawi hnih champion tawh Muguruza chu wildcard pek a nih vangin a inlan thei dawn thung, Spain nula bakah hian champion lai Belinda Bencic, Simona Halep, Karolina Pliskova, Elina Svitolina leh Australian Open champion Sofia Kenin te pawh an inlan ang.