MFA Cup-ah goal lut a tam

C. Ṭhuamluaia Mual, Lungleia MFA Cup khelh mekah goal a lut tam ṭhin hle - ni hnih inelna neih tawh niin, match ruk khelh a ni tawh a, goal 25 ngawt a lut tawh!

Nimina inkhel hmasa berah Lunglawn FC chuan 2-0 in Keifang FC an hneh a, Lunglei club tan Silvana R. Lalruatkima leh Vanlalramnghaka ten goal khat ve ve an khung.

Meisatla FC-in an match hmasa berah Bawrai 2-0 in an hneh a, Siaha club hian niminah draw result chauh pawh hlawh chhuak se, knockout round lut tur an nih laiin, Aizawl FC Academy chu 3-2 in an ngam lo.

An match hmasa ber khel AFC Academy tan Lalhruaitluanga (penalty) leh Vanlalhriatrenga ten hmahruaina goal vawi hnih an khung a, Meisatlain Lalrinliana leh HC Willis Byhna hmangin an chhanglet.

Minute 90 chhung goal dang a luh loh avangin Meisatla hi an tlang mai dawn niin a lang tawh a, mahse, AFC tan Christopher Zaithantluanga'n hun pek belhah chakna goal a khung - Meisatla tan vawiina Bawrai FC leh AFC inkhel result nghah leh phawt a ngai.

Nimin inkhel hnuhnung berah inkhel hmuhnawm bik chhawpsak kan ni a, Hmar Veng FC leh Ramthar FC te 3-3 in an inhnehtawk - Ramthar hian match khat khelh tur la nei chungin quarterfinal an lut.

Serchhip club Hmar Veng tan Vanlalpekhlua'n goal hnih khungin, Francis Rosangliana'n a belhchhah bawk - Lunglei club tan J. Lalduhawma'n goal hnih khung ve thoin, Alan Lalramkinlova'n goal khat a thawh bawk.

MFA Cup-ah hian club 12 inelin, group paliah team pathum zel an awm - an inkhelh kual hnuah group tina a sang pahnihte hi quarterfinal khel turin an tling leh a ni.