Pereira hoin Forest-in Fenerbahce tlawh dawn

Zanin dar 11:15 hian Nottingham Forest-in Europa League knockout playoff-ah Fenerbahce an len chilh dawn a, Vitor Pereira hnuaia an match hmasa ber tur a ni.

Forest hi Sean Dyche-a hnuaiah an che ṭha lo a, point 27 hmuin Premier League table-ah 17-naah an awm a, an match hnuhnung 10-ah vawi hnih chiah hnehna changin relegation zone-a awm West Ham United aiin point thum chiahin an sang zawk.

Dyche hnuaiah club lian an ngam nghal a, an insiamrem dawna a lan laiin an daih rei lo a, result ṭha an neih chhunzawm theih loh avangin ni 114 hnu lawkah English manager hi an ban.

Vitor Pereira hnuaiah Forest-in training an nei tawh a, Portuguese manager chuan, "Tun season-ah manager hrang hrang an hrawn avangin player-te tan a harsa dawn tih ka hriatthiampui a, he hmun ka pan chhan chu player-te theihna ka hriat vang a ni. Player te nen thawk hoin hmasawn kan tum dawn," a ti a, player te a ringtawk.

Portuguese coach hnuaia Premier League match hmasa berah Forest hian Liverpool an hmachhawn nghal dawn, inrintawkna an neih theih nan Europa League-a an chak a pawimawh dawn. Pareira hoin Turkey-ah result ṭha neih an tum ang.

Nottingham Forest tan tlarhma lamah Chris Wood a la inlan thei dawn lo a, New Zealand forward hi a khup hliam vangin a la chawl mek a, April-ah a rawn kir dawn chauh. Wood awm dawn lo mah se Igor Jesus a awm dawn a, Jesus hian tun season Europa League-ah goal ruk a khung tawh a, Ludogorets Razgrad midfielder Petar Stanic (goal 7) chiah a tluk lo.

Jesus hi Manchester City hel lai Morgan Gibbs-White nen an inkawp a rinawm a, Callum Hudson-Odoi leh tun hnaia club lian tam tak chil tiputtu Elliot Anderson an awm dawn bawk a, Fenerbahce laka danglamna thlen thei turin theihna sang tak an nei.

Hetihlai hian Fenerbahce-in player langsar an kawl hnem a, goal li khung tawh Kerem Aktürkoglu leh Talisca te an inkawp leh thei dawn a, player pahnihte hi Europa League khel tawha hmatawng hlauhawm ber pawl an ni.

Si ban nghak turin Man City keeper hlui Ederson a awm dawn a, Premier League lo khel tawh Caglar Soyuncu, Edson Alvarez, Marco Asensio, Nelson Semedo, Fred, Sofyan Amrabat te an kawl bawk.

January transfer-ah Fenerbahce an che na a, N'Golo Kante, Matteo Guendouzi leh Sidiki Cherif te an seng lut a, an player lak luhte hi tawnhriat an ngah avangin Forest tan an mualah Fenerbahce hneh a awlsam dawn lo.