Feyenoord-in Sterling an ngai pawimawh

Feyenoord chuan an player thar Raheem Sterling-a'n Netherlands-ah work permit a neih theih loh vangin Belgium-ah training an neih phah. Dutch club training-na hi Tubize, Belgium a ni a, Feyenoord innghahna khua Rotterdam aṭangin 137 km-a hla a ni.

Eredivisie-a pahnihnaa awm mek Feyenoord manager Robin Van Persie chuan, "Kan training-na hmun kan sawn chhan chu Sterling vang a ni a, a team thar bulah a rang thei ang bera training nei tura kan duh vang a ni," tiin Sterling vang liau liaua training-na hmun sawn an nih thu a sawi.

Feyenoord hian Pathianni zan hian Telstar an mikhual dawn a, Telstar an hmachhawn hunah Sterling hian work permit a neih hman an beisei. Eredivisie table-ah Feyenoord hi pahnihnaah awm mekin hmahruaitu PSV Eindhoven chu point 14 in an pha lo.

English forward Sterling hian a career-ah Liverpool, Manchester City, Chelsea leh Arsenal-ah te a khel kual tawh a, Arsenal aṭanga Chelsea-a a kir hnuin a inkhel mumal tawh lo. January khan club nen inbiakremnain a contract an titawp a, club tam takin rim mah se Feyenoord a kal a thalng ta zawk.

Sterling hian England tan match 82 inlanin goal 20 a khung tawh a, mahse 2022 hnuah ram tan a inlan leh tawh lo. Robin Van Persie hnuaiah harhtharna chan tumin a bei dawn a, kumina khelh tur World Cup-ah England tan inlan a tum leh dawn.