Guirassy hoin Dortmund an chak

Champions League last 16 playoff khelh mekah Thawhlehni zan khan Borussia Dortmund chuan 2-0 in Atalanta an hneh a, second leg khelh tur la awm mah se last 16 lut turin an dinhmun a ṭha. Dortmund tan Serhou Guirassy leh Maximilian Beier ten goal an khung a, Atalanta-in chhanletna tur an nei lo.

Mualneitu team Dortmund-in an stadium Signal Iduna Park an panna kawngah traffic buaina vangin an tlai a, minute 15 laiin inkhel tihkhawtlai mah se khelmualah a buai phah lo.

Inkhelh ṭan aṭangin Dortmund an hlauhawm nghal a, minute thumna lekah Julian Ryerson-a cross chu Guirassy-a'n a tauh lut a, Atalanta defender ten Guirassy an ven ṭhat tawk loh avangin Dortmund-in hma an hruai nghal. Guinean forward Guirassy hian tun season UCL-ah goal li a khungna chiah a ni.

Guirassy a khel ṭha chhunzawm a, minute 42-naah Beier goal khung tur a siamsak a, goal an khung theih nan Guirassy a thawhhlawk a, goal khung tawh lo mah se Atalanta defender te tan a hnawksak tluan zak.

Second half-ah mikhual team Atalanta-in ball an chang hnem zawk a, chance hlauhawm erawh an insiam thei lo. Hun tawp thlenga goal an khung theih loh avangin a tlawm zawkah an ṭang a, second leg-ah Dortmund lehthal an tum ang.