Crystal Palace hmaah Mostar

UEFA Conference League-ah zanin dar 11:15 hian Premier League club Crystal Palace-in Zrinjski Mostar an hmachhawn dawn a, club pahnih hi an vawi khat intawnna tur a ni.

Bosnia and Herzegovina club Zrinjski hi an ram league-ah pahnihna an ni mek a, Europa League-ah erawh vawi hnih chiah chakin knockout playoff khel turin an tling hram.

Chutihrualin Crystal Palace pawhin nipu bazara Eberechi Eze an chan hnuah thlasik bazarah captain Marc Guehi an chan leh avangin an squad a chhah tawk tawh lo.

Palace hian an match hnuhnung berah Burnley an hneh lo a, Zrinjski lakah pawh chak an awlsam lo ang. Season tawp rualin manager Oliver Glasner a chhuak dawn a, tun season-a nomawi an chawi theihna chhun Conference League hi an ngai pawimawh ang.