Monaco lakah Doue-a'n PSG chhanhim

UEFA Champions League champion lai Paris Saint Germain chu Thawhlehni zan khan an inlan a, French club tho AS Monaco nen inhmachhawnin goal hnih an chhuah hmasak hnuah an lehthal a, 3-2 in khualmualah hnehna an chang.

Monaco tan Folarin Balogun-a'n goal hnih a khung a, PSG tan Desire Doue-a'n goal hnih a khung bakah Achraf Hakimi-a'n Doue goal khung karah goal khat a khung ve bawk.

Vanduai kaltluang PSG

Stade Louis II-a inkhelah mualneitu Monaco-in goal an khung hma a, minute khatna lekah Aleksandr Golovin-a ball cross chu Balogun-a'n hnai tak aṭangin hmahruaina goal a tauh lut a, Moanco-in goal an khung hma hle. PSG defender ten Balogun an veng ṭha tawk lo a, Balogun-a'n goal a khung dawnah hmu awl a ngah hle.

Balogun a hlauhawm chhunzawm a, minute 18-naah Maghnes Akliouche ball pek ṭha tak a um lut a, PSG captain Marquinhos-a tihbuai karah cool takin a pet goal a, an hmahruaina a belhchhah. American forward Balogun hian tun season Champions League-ah goal nga a khungna chiah a ni.

Minute 20-naah PSG winger Khvicha Kvaratskhelia chu Monaco defender Wout Faes-a'n a tihtluk avangin PSG-in penaalty an hmu. Penalty pet turin Vitinha a rawn pen chhuak a, an siphurh sut ṭhenna hun ṭha nei mah se Portuguese midfielder hian a hlah a, Monaco keeper Philipp Köhn-a'n a dang ṭha hle.

Goal an chhuah hma bakah penalty an hlah avangin PSG vanduai zanah a ngaih theih hman a, minute 26-naah Ballon d'Or kawltu Ousmane Dembele a inhliam angin lakchhuah a ngai a, PSG an chak loh a rinawm hman.

Mamawh chhanna Desire

PSG vanduai a kaltluan lai takin Dembele thlaktu Desire Doue a nung nghal a, ground chhung a luh aṭanga minute hnihna lekah goal khung nghalin an siphurh a sut ṭhen a, PSG a tiphur thar.

Doue bawk kan hmuh chhunzawm a, minute 41-naah box pawn aṭanga a ball pet kawh tak chu Köhn-a'n dang mah se a per let chu Hakimi-a'n pet goal-in an siphurh a sut zo. Mual sirah PSG coach Luis Enrique-a'n an goal khung lawma a zuang chuan PSG ṭan zia a tilang a, First half-ah an siphurh an sut zawh avangin Enrique a lawm hle.

Second half ṭan aṭanga reiloteah Monaco midfielder Golovin-a'n chiang takin Vitinha nghalah a tlawh a, referee-in yallow card pe zet mah se VAR ennawnna neih a nih hnuah red card a phawrh ta zawk a, inkhel bul ṭan ṭha zawk Monaco dinhmun ṭha lo zawkah an ṭang.

Monaco-in red card hmuh hnuah PSG an chungnung zawk a, ball chang hnem zawkin an khel a nung thar. Minute 67-naah Warren Zaïre-Emery pass chu Doue-a'n goal kilah tak a pet lut a, PSG chakpui nan a tawk. PSG-in Bradley Barcola leh Lee Kang-in hmangin chance neih chhunzawm mah se goal a lut tawh lo a, PSG-in Monaco lehthalin an chak.

Chak mah PSG lawm a kim lo a, an thiampuipa Dembele a inhliam leh vang a ni. Dembele inhliam dan hi hriat chian la ni lo mah se a chawn tha a nih a rinawm. Coach Luis Enrique chuan,"Player te dinhmun kan hrechiang a, risk ka lak ngam loh vangin Dembele kha kan lakchhuah a ngai. A hliam hi kan en dik ang a, a nat dan tak pawh kan hriatchian vat ka beisei," a ti.

Paris club hi chak mah se thlamuang takin an awm hman lo. Inrinni zanah Monaco hian Ligue 1 table hmahruaitu RC Lens an tum dawn a, an inkhel result hre reng chungin PSG hian Pathianni zanah Metz an mikhual dawn a, Enrique hote hi league table-ah pahnihnaah awm mekin chetsual nawn an duh dawn lo.