Pacquiao leh Provodnikov inhnek dawn

Veteran boxer Manny Pacquiao chuan exhibition match a khel dawn a, April 18, 2026 hian light-welterweight champion hlui Ruslan Provodnikov nen an inhnek dawn.

Kum 47 mi Pacquiao hian nikum June-a Mario Barrios a hneh loh hnuin a inhnek leh tawh lo a, tun hi a inhnek leh hmasak ber tur a ni. Boxer pahnihte hi Thomas and Mack Center, Las Vegas-ah an inhmachhawn ang.

Filipino boxer Pacquiao chuan,"Ka kalna apiangah Phillipines hi ka hre reng a, khawvel pumpuia min ṭantute leh ka ramin min support-na hian ka rilru a chawk tho ṭhin. Chuvangin an tan fight hmuhnawm tak kan phochhuahsak dawn a, Las Vegas-a ka inlan leh thei tur hi ka lawm a, inhnek turin ka inpeih tawh," tiin a phur tawh thu a sawi.

Pacquiao hi a career-ah vawi 62 a chak tawh a, vawi riat tlawm zawkah ṭangin vawi thum a khingpuite nen an inhnehtawk a, exhibition match a hmachhawn hnuhnung vawi thumah chak loh a nei lo a, vawi hnih chakin vawi khat an inhnehtawk. Nikum khan Pacquiao hi boxing Hall of Fame-ah lakluh a ni bawk.

Hetihlai hian a khingpui tur Russian boxer Provodnikov hi a career-ah vawi 25 chakin vawi nga a tlawm tawh a, kum 42 ni ve tawh mah se Pacquiao nen match hmuhnawm tak an khelh a beiseiawm.