Postecoglou-a'n Celtic-a kir a tum lo

Celtic-a hlawhtling tak Ange Postecoglou chuan a club hlui nen sawizawm hlawh mah se, a kir a rin loh thu a sawi chhuak a, Australian coach chuan, "Club hluiah ka kir tawh ngai lo," a ti.

Kum 60 mi coach hian Celtic hi kum hnih a enkawl chhungin nomawi panga a chawipui a, mahse, kum 2023 khan Tottenham Hotspur sawmna pawmin a chhuahsan.

Spurs-in an ban hnuah Nottingham Forest enkawl leh zuai mah se, ban a tawk leh ta tho a, kum 60 mi manager hi Celtic chuan nipuiah an manager nghet ni tura rim an tum nia sawi thawm a awm.

Mahse, Postecoglou chuan, "Ka club enkawl tawhah ka kir leh tawh ngai lo a, ka tih dan a ni ve lo. Celtic hi ka hmangaih a, nuam ka ti em em. Kum naupang deuh chu ni ila, kha aia rei kha ka awm hial ang.

"La awm zel ila chuan, Europe-ah nasa taka hma ka sawnpui theih ka ring hial. Mahse, Spurs sawmna kha hnar a harsa ta em a ni," a ti a, a kum a tam tawh avangin Premier League Big Six club enkawlna chance hnar a harsat thu a sawi.

Postecoglou chuan sawi zawmin, "Celtic hi ka ngainat ngaiin ka la ngaina reng a, tawnhriat hlimawm tak ka tawnna hmun a ni. Khati taka club hmangaihtute zinga ka tel thei kha ka lawm a, hlawhtlinna chang turin ka vannei em em bawk.

"Tawnhriat hlimawm tak ka tawng a, minute tin kha nuam ka ti em em. Celtic-a ka hnathawh lai ka thlirlet apiangin lawm takin ka thlirlet ṭhin. Mahse, kir erawh ka tum lo a, chutiang chu ka ti ve ngai lo a ni," a ti a, Scottish club-ah kir tumna a nei lo.

Postecoglou hian Celtic tan khan Scottish Premiership (2), Scottish Cup leh Scottish League Cup (2) a la a, Tottenham Hotspur pawh Europa League-ah a champion pui.

Mahse, Spurs-in an ban hnuah September khan Nottingham Forest a zawm a, match riat a enkawlah chakpui a nei miah lo - vawi hnih draw an nei a, vawi ruk ngawt an tlawm a ni.