Club Brugge lakah Atletico chak zo lo

Nilaini zan Champions League-ah Atletico Madrid chuan 3-3 in Belgian club club Brugge an inhnehtawkpui a, Atletico hian vawi hnih hma hruai mah se an siphurh an sut zawhtir a, last 16 lut turin second leg-ah an chak ngei ngei a ngai.

Inkhel ṭan aṭanga minute riatna lekah Julian Alvarez-a'n penalty aṭangin goal hmahruai a khung a, first half hun pek belhah Ademola Lookman-a'n corner aṭanga ball lo kal chu hnai tak aṭangin a khung a, first half-ah goal hniha hma an hruai avangin Atletico an chak mai a rinawm.

Mahse second half-ah mualneitu Club Brugge an insiamṭha a, minute 51-naah Raphael Onyedika-a'n a pet goal a, Club Brugge an phur thar. Minute kaw hnu lawkah Nicolò Tresoldi-a'n hnai takin aṭangin a pet goal leh a, an siphurh an sut zo.

An siphurh an sut zawh hnuah Belgian club an chesual a, minute 79-naah Atletico midfielder Marcos Llorente cross satliah chu Club Brugge defender Joel Ordonez-a'n an lamah a tilut palh a, hun tawp lam a hnaih tawh avangin an chak lo dawnin a lang hman.

Inkhelh banah Atletico manager Diego Simeone chuan, "Champions League match kan khelh tawha harsa ber pawl a ni. First half-ah inkhel kan thunun a, kan vanneih zan ni se goal hnih dang khung belh thei tur kan ni.

Mahse second half-ah a bet zawkah kan ṭang a, a ngai angin kan nawr thei tawh lo a, anni lamin chu chu kan tihsual lai takin min chhuzui avangin goal kan chhuah a, chak kan phu lo," tiin a naute chu second half-ah an inthlahdah thu a sawi.

Club Brugge-in an mualah awlsam taka tlawm mai an tum lo a, minute 89-naah Christos Tzolis-a'n goal khung lehin an siphurh a sut nawn. Hun a tawp zui nghal mai avangin Atletico-in chhanletna tur an nei tawh lo a, an result-ah an lungawi a ṭul.

Inkhel dangah German club Bayer Leverkusen chuan khualmualah hnehna an chang a, Olympiakos chu Patrik Schick-a goal hnih hmangin 2-0 in an hneh a, second leg-ah Greece club hi an lo mikhual ve thung dawn.