Kolasib club chak nghal

MFA Cup khelh mekah nimin khan match thum khelh a ni a, a vawi khat nana inlan, Kolasib club Electric Veng FC chuan 1-0 a Lunglawn FC hnehin, chak result nen bul an ṭan.

C. Ṭhuamluaia Mual, Lungleia inkhelah Electric Veng tan MS Dawngzuala chuan minute sarihna lekah goal hmahruai a khung a, goal tam zawk lut tura beisei a nih laiin, goal dang erawh kan hmu zui lo.

Lunglawnin an match hmasa bera Keifang an hneh avangin, an tan quarterfinal lut turin draw result a tawk a, mahse, an chak zawh loh avangin midang result an ngaihven leh phawt a ṭul dawn.

Nimin inkhel hmasa berah Kanan FC leh Vengthar GSA te 1-1 in an inhnehtawk - Champhai club Kanan tan Rohmingthanga Bawlte chuan minute 88-naah goal hmahruai a khung a, hun a tam tawh loh avangin an chakpui mai dawn niin a lang tawh.

Mahse, Khawzawl club-in ngaihdan dang an nei a, hun pek belhah Lalhmangaihsanga'n si phurh sutna goal khungin, 1-1 in an inhnehtawk a, inkhel a tawp zui. Vengtharin an match hmasa berah Chandmary FC an lo hneh tawh a, draw result an neih leh tak avangin quarterfinal an lut.

Kanan erawh quarterfinal lut turin vawiin inkhelah chak leh phawt a ngai dawn a, chhun dar 12:30 hian Lawngtlai club Chandmary FC nen an intawng ang.

Nimin inkhel hnuhnung berah beisei loh result kan hmu a, Bawrai FC chuan Aizawl FC Academy barakhaihin, 1-0 in an hneh - Malsawmzela'n minute 42-naah goal awmchhun a khung a, mahse, quarterfinal luh nan erawh a tawk zo lo.

Group A-ah Siaha club Meisatla FC, Aizawl FC Academy leh Bawrai FC te an awm - an inkhelh kual hnuah point thum ṭheuh an hlawh chhuak a, goal difference hmangin Bawrai an tla a, Meisatla leh AFC Academy ten quarterfinal an lut ta thung a ni.

MFA Cup hi vawiinah khelh chhunzawm tur niin, match thum a awm leh ang - club 12 inelnaah hian club-te chu group paliah, team pathum zel awmin ṭhen hran a ni a, group tina a sang pahnih hian quarterfinal an lut a ni.