Mohammedan khelmualah Goa leng dawn

Indian Super League-ah zanin dar 7:30 hian Mohammedan SC chuan FC Goa an mikhual dawn a, team pahnih hi match khat khelh tawha chak zo lo ve ve an ni a, zanin match hi a pawimawh dawn.

Mohammedan hian an match hmasa berah Jamshedpur chu 1-0 in an ngam lo a, hetihlai hian Goa erawh kai thar Inter Kashi nen 1-1 in an inhnehtawk thung.

Tun season ISL-ah team tinin match 13 chauh an khel dawn a, an inkhelh kual hnua a sang ber an champion dawn. Hei vang hian club tin tan vawi khat chetsual hlek pawh a pawi a, club pahnihin a zawna point hlawhchhuah zawh loh an duh lo ang.

Mohammedan-in Mizo player pariat ngawt an kawl a, Joe Zoherliana (Defender), Zodingliana Tochhawng (Defender), Joseph Lalmuanawma (Defender), Jeremy Laldinpuia (Midfielder), Lalngaihsaka (Midfielder), Lalremsanga Fanai (Midfielder), Rochharzela (Midfielder) leh Lalthankima (Forward) te an ni.

Jamshedpur lakah Remsanga leh Thathana ten inkhel bul an ṭan a, bench aṭangin Lalngaihsaka a lut bawk. Zaninah pawh Kolkata club tan Mizo player an inlan leh nual a rinawm.

Hetihlai hian FC Goa-ah pawh Mizoram player pali ngawt an awm a, Inter Kashi lakah pawh bul ṭantu, Dinthar tlangval Ayush Chhetri chu inlan ngei tura beisei a ni.

Ayush bakah hian Jerry Lalrinzuala chuan nikum khan FC Goa hi season hmasa zawh hnu lawkah a zawm a, striker Daniel Lalhlimpuia an la lut thar bawk - midfielder Malsawmtluanga hi FC Goa Under-18 team aṭanga Goan club tana khel ṭan tawh a ni bawk.