March-ah Isak a lo kir dawn

Liverool boss Arne Slot chuan hliam vanga chawl reng, a striker thar Alexander Isak chu a lo kir leh hnai tawh niin a sawi a, March thla tawp lamah chuan lo kir hman tura beisei a ni, a ti.

Isak hi December thlaa a inhliam hnuah Reds tan a inlan leh tawh lo a, pound maktaduai 125 man striker hian tun season inelna hrang hrangah match 16 chauh a la khel a, goal thum chiah Reds tan a la khung bawk!

Slot chuan, "Alex-a'n training-na lamah khelmual a lut ve leh ta a, mahse, ballboot pawh la bun rih loin, a pheikhawk pangngai nen a la ni rih a ni," a ti a, an striker thar chu chiang taka a la dam var rih loh thu a sawi.

Dutch coach chuan sawi zawmin, "Tunah chuan ball pawh a khawih ṭan ve leh hnai tawh a, mahnia training phawtin, chumi zawhah team a zawm ve leh ang. Inkhel leh tur hian hun a fân ve deuh a ngai a ni," a ti.

Slot chuan a lo kir hun tura a rin thu sawi zuiin, "March thla tawp emaw, April thlatirah emaw a lo kir mai ka ring," a ti a, Liverpool fan-ten 'Isak' tak tak hmuh an châk tawh khawp ang.

Hetihlai hian inhliam ngun ve tak Jeremie Frimpong pawhin dam lam a pan a, karleha West Ham an mikhual hunah chuan lo kir leh thei tawh tura beisei a ni.

Tun season-ah Liverpool-in beisei an phak lo a, Premier League nomawi pawh Manchester City leh Liverpool-ah tu zawkin nge nomawi chawi ang tih boruak a awm laiin, Reds-in result chhia an ngah hret a, table-ah parukna an ni mek.

Pathianni zan dar 7:30-ah Reds hi an inlan zui dawn a, Nottingham Forest an lenchilh dawn - Forest hian Ningani zan khan Europa League-ah Fenerbahce chu 3-0 in an hneh.

Forest hian February 12 khan an coach Sean Dyche chu an ban a, February 15 khan Vítor Pereira an la lut. Fenerbahce an sawp hi Wolverhampton Wanderers boss hlui hoa an match hmasa ber a ni a, inringtawk takin Liverpool an mikhual thei ang.