Alonso-a'n Marseille a hnar

Real Madrid ban tak Xabi Alonso chuan tun hnai khan French club Marseille sawmna a hnar a, Ligue 1 club hian Spanish coach hi dawr zui tawh loin, Rennes coach ban hlim Habib Beye an la lut zui.

Marseille hi tun season-ah an talbuai hle. Paris Saint-Germain laka 5-0 a an tlawm hnuah coach Roberto De Zerbi a bang a, a hnu lawkah sporting director Medhi Benatia pawhin banna a theh lut zui.

Mahse, club neitu Frank McCourt chuan Benatia banna hi pawm loin, season tawp thleng tal an hnena awm turin a ngen a, Benatia hian a pawm - infiamna kaihhnawih ngawr ngawrah thu ber nihna a pe bawk.

Hetiang a nih avang hian club president Pablo Longoria chu a thuneihna ṭhenkhat chhuhsak a ni, tihna a ni a, Longoria pawh hi ban tumin a ukilte nen an inrawn mek niin an sawi.

Alonso-a'n Marseille boruak enin, French club hi zawm chiah a ngai lo a, inngaihtuah buai loin a hnar nghal! Bayer Leverkusen tana Bundesliga nomawi chawi thei Alonso hian Liverpool a ngaihven tel nia sawi a ni bawk.

Reds-in tun season-ah beisei ang result an nei hleithei lo a, club thuneitu lamin Arne Slot thlawp mah se, a dinhmun hi 100% a him tia sawi chi a ni lo - 'ban thut' thleng thei thilah Alonso hian a club hlui Liverpool hi a ngaichang ru reng niin an sawi.