Pereira hnuaiah Forest chak nghal

Nottingham Forest chuan an manager thar Vitor Pereira hnuaia an match hmasa berah hnehna an chang nghal a, Ningani zan khan Europa League last 16 playoff-ah Fenerbahce 3-0 in an sawp. Forest tan Murillo, Igor Jesus leh Morgan Gibbs-White ten goal khat ṭheuh an khung a, Fenerbahce-in chhanletna tur an nei lo.

Sukru Saracoglu Stadium, Istanbul-a inkhelah Forest mikhual team Forest an nung a, manager thar hnuaiah an phur tih a lang. Minute 21-naah defender Murillo-a'n center aṭanga ball a khalh hnuah goal kilah tak a pet lut a, a team hma a hruaipui.

Goal an khung hnuah Forest-in an nawr chhunzawm a, minute 43-naah Elliot Anderson-a corner pet chu Igor Jesus-a'n hnai tak aṭangin a tauh lut a, Fenerbahce keeper Ederson tan dan ngaihna a awm tawh lo. Jesus hian tun season Europa League-ah goal sarih a khung tling chiah a, Ludogorets midfielder Petar Stanic nen an khung hnem ber.

Second half tir lamah mualneitu an hlauhawm hmasa a, Sidiki Cherif-a'n chance a nei nghal a, Forest keeper Stefan Ortega-a'n a dang ṭha hle. Ball chang tam zawk mah se Fenerbahce-in chance an insiam chhunzawm thei lo a, Cherif-a goal shot tih loh chu goal zawnah an pet leh tawh lo.

Nottingham Forest erawh an phur chhunzawm a, minute 50-naah Igor Jesus-a'n Gibbs-White tan pein, English forward hian an goal thumna atan a khung. Goal an khung danah Igor Jesus leh goal khungtu Gibbs-White te offside angin an lang a, VAR hmanga ennawn a nih hnuah Jesus-a hnungah Nelson Semedo lo awmin, Gibbs-White a offside lo bawk a, goal-ah an pawm tlang.

Forest-in Nicolás Domínguez leh Nico Williams te hmangin chance an neih chhunzawm a, Ederson an paltlang theih tawh loh avangin goal a lut tawh lo. Inkhel tawp zuiin manager thar hnuaiah Forest nuamsa takin an chak.

Inkhelh banah Forest manager Vitor Pereira chuan,"Kan khel ṭha a, kan vanneih zan ni se goal hnih dang khung theihna chance kan nei. Forest ka zawm hmain player-ten theihna sang tak an nei tih ka hmu a, inrintawkna an mamawh a, chu chu result ṭha neih nan a pawimawh ber. Khelmual chhungah an theihtawp chhuah turin ka ti a, team tan theihtawp an chhuah avangin kan chak," tiin a player te a fak.

Second leg khelh tur la awm mah se Forest hi last 16 lut tuirn an dinhmun a ṭha tawh a, February 26 zanah Fenerbahce hi City Ground-ah an lo mikhual ve thung ang. Chutihrualin Forest hi thlamuang taka awm hman an la ni lo - Pathianni zan hian Liverpool an mikhual dawn.

Premier League table-ah Forest hi 17-naah awmin relegation zone-a awm West Ham aiin point thum chiahin an sang zawk a, Portuguese manager Pereira-'n hna a la ngah dawn chauh.