Zrinjski lakah Crystal Palace chak zo lo

Ningani zan Conference League knockout playoff inkhelah Crystal Palace chuan an goal khung an hum zo lo a, Bosnian club Zrinjski nen 1-1 in an inhnehtawk. Crystal Palace tan Ismaila Sarr-a'n goal a khung a, Zrinjski tan Karlo Abramovic-a'n a sut.

Team pahnihten chance vawi tam an inneih chhawk hnuah goal a lut a, minute 44-naah Palace forward Sarr-a'n goal kilah pet lutin a team hma a hruaipui.

Second half-ah pawh Crystal Palace-in inkhel an thunun a, chance insiam nual mah se an vanneih zan a ni lo a, goal an khung belh tawh lo. Minute 55-naah mualneitu Zrinjski tan Abramovic-a'n an si phurh sutna goal a khung.

Team pahnihten goal an khung belh theih tawh loh avangin an inhnehtawk a, February 26, Ningani zanah second leg khel turin Palace-in Selhurst Park-ah Zrinjski an lo mikhual ve thung ang.

Bosnian Premier League club Zrinjski-ah hian India coach hlui Igor Stimac chu coach a ni - Croatian coach Stimac hian Zrinjski hi BPL-ah pawh pahnihna a nihpui mek a, Palace hi second leg-ah an hneh theih chuan ECL round of 16 an lut ang.