India-in Kiwis an hneh nawn

Pathianni khan India-in Eden Park, Auckland-ah New Zealand chu wicket sarihin an hneh a, T20 series match nga khelh turah 2-0 in hma an hruai. Men in Blue leh Kiwis hian vawiin chhun dar 12:30 hian Seddon Park, Hamilton-ah match thumna an khel ang.

Ṭhumvawrah New Zealand an vannei a, vuak hmasak an thlang. India bowler-ten an theihna an lantir a, Kiwis-in over 20-ah run 135/5 an siam. Ravindra Jadeda chuan wicket hnih lain run 18 chauh a pe a, Shardul Thakur, Jasprit Bumrah leh Shivam Dube ten wicket khat ṭheuh an la bawk.Kiwis tana run siam tam Martin Guptill (33), Tim Siefert (33) leh Colin Munro (26) ten half century an tlin lo. India bat hun a thleng a, KL Rahul-a'n thi loin run 57 siamin Shreyas Iyer-a'n run 44 siamin a rawn thlawp ṭha bawk.

 

Virat Kohli hote hian over 17.3 lekah an target hi umphain run 135 an siam a, wicket thum an hloh. India captain Kohli chuan, "Bryant-a chanchin hian min ṭhawng hle. A inkhel en turin naupan laiin kan tho hma a, court chhunga a chevel hmuhnawm tak tak chu kan thlir ṭhin. Nunna chunga thuneihna kan neih lohzia leh derthawnzia a lang chiang hle. A fanuin nunna a chan leh zel hian min ṭhawng a, a chhungkua ka tawrhpui takzet," tiin basketball legend Bryant chunga thil thlengin a ṭhawn thu a sawi. India player Rohit Sharma leh Shreyas Iyer te pawhin instagram-ah Kobe Bryant te pafa tarlangin an ui thu an ziak ve bawk.