Milan-in Inter thlah fal

Serie A-ah AC Milan chu 1-1 in Cesc Fabregas-a enkawl Como nen an inhnehtawk a, an hmelma Inter Milan chu khelh zat inangah point sarih ngawtin an phak tawh lo a, hmahruaitu Inter aiin pathumna Napoli nen an inhnaih tawk zawk. Nilaini zana inkhelah hian Como tan Nico Paz-a'n goal a khung a, Milan tan Rafael Leao chuan sutin Milan an him hram.

San Siro-a inkhelah hian mualneituin inkhel an thunun zawk a, mahse a pawimawh ber goal khung an harsat. Minute 32-naah Milan keeper Mike Maignan chesualin, Como forward Nico Paz a pass palh a, Nico Paz-a'n goal-ah pet nghalin a team hma a hruaipui. Argentine forward Nico Paz hian tun season-ah goal riat a khungn tling chiah a, Inter forward Lautaro Martinez (14) chiah a tluk lo.

Second half-ah Milan an insiamṭha hret a, minute 64-naah Rafael Leao-a'n keeper pet khumin an si phurh a sut. Inkhel tawp hma deuhin field sirah buaina tenau a chhuak a, Milan coach Massimiliano Allegri hnawhchhuah a ni. Goal dang a luh belh tawh loh avangin team pahnihte point khatah an lungawi a ṭul.

Milan hian Pathianni zanah Parma an mikhual leh nghal dawn a, champion an tum a nih chuan an chetsual a thiang tawh lo. Hetihlai hian an hmelma Inter-in Leece an tlawh dawn a, Inter hi UCL match hnuhnung berah Bodo/Glimt an hneh lo a, Cristian Chivu naute hi Milan nen an inkar a zau tawh avangin Serie A-ah chak loh nawn an tum tawh lo ang.