Harry Kane hming Barcelona inthlanah a ri
Spanish club lian Barcelona chu President thlang ṭha turin an inbuatsaih mek a, an inbuatsaihna kal mekah candidate zinga mi Xavi Vilajoana chuan a tling a nih chuan Bayern Munich forward Harry Kane a lakluh tur thu a sawi - March 15-ah Barca President thar hi thlan a ni dawn.
Barca inthlan season a ni a, boruak pawh a sangin candidate te an campaign nasa a, Vilajoana-a'n social media lamah Harry Kane lakluh a tum thu a sawi chuan sawi zui a hlawh hle.
Vilajoana chuan,"La Masia player te kan ngaih pawimawh ber tur an ni a, mahse player theihna nei sang takte kan lak tho a ngai," tiin Kane-a'n Barca kawr a ha lai chu a post.
Hetihlai hian candidate dang Marc Ciria chuan Barcelona khawpui lun laiah Lionel Messi chuanna banner lian tak a tar a, 'kan hmuh leh vat che kan beisei' tih inziakin, hei hian Barca inthlan boruak a tinung hle.
English forward Kane hi tun season-ah a che ṭha a, inelna hrang hrangah goal 41 a khung tawh a, hetiang zat khung tur hian match 35 chiah a mamawh. Bundesliga-ah ringawt goal 26 a khung tawh a, amah hnaih bertu a teammate Luis Diaz (13) aiin a letin a khung tam zawk.
Kar hmasa khan Kane hian record a siam a, a career-ah goal 500 khung tlingin football chanchina goal 500 khung thei 27-na a ni. Goal 500 khung tling tur hian match 743 a mamawh. La inkhel mek zingah Cristiano Ronaldo (962), Lionel Messi (896), Robert Lewandowski (690), Luis Suarez (600) leh Karim Benzema (517) te chiah a tluk lo.
Kane hi a chet ṭhat avangin Bayern pawhin chelh an duh a, inbiakna la awm lo mah se a contract pawh sei an tum. Kane hian Bayern-ah 2027 thleng chauh contract a nei tawh a, Barca lam an lo lan ve bawk avangin a hma hun a chiang ta lo hle.
Bayern hian zanin dar 8-ah Frankfurt an mikhual dawn a, Kane a lansarh leh a rinawm. Bavarians hi kar leh lawkah anmahni hnaih bertu Borussia Dortmund nen an inhmachhawn dawn a, club pahnihte hi point ruk chiaha inthlau tawhin, Bayern hian Dortmund an tlawh hunah presurre neih an duh loh chuan Frankfurt an hneh a ngai.