Dinhmun inthlak thei reng Real leh Barca

La Liga hmahruaitu Real Madrid chuan hmahruai chhunzawm zel tumin Osasuna an lenchilh dawn a, Alavaro Arbeloa naute hi zanin dar 11-ah an inkhel dawn. Real lehpelh châka tuihal Barcelona chuan Pathianni zan dar 8:45-ah Levante an mikhual ve thung dawn.

Real hi an manager thar Arbeloa-a'n a enkawl tirhin beisei pha lo mah se an insiamrem tawh a, kar hmasa khan Barca lehpelin table hmahruaitu an ni. Osasuna lakah inhliam vangin Eder Militao, Jude Bellingham te chu khel lo tur chiang sa an ni a, Brazilian forward Rodrygo dinhmun a chinag lo bawk.

Hetihlai hian a inhliam hnua lo kir leh Trent Alexander-Arnold a khel ṭha a, Liverpool defender hlui khel a hmuhnawm thei hle. Tlarhma lamah Vinicius Jr leh Kylian Mbappe te an awm leh thei dawn a, Vini hi tun hnaiah goal a khung chho leh tawh a, UCL match hnuhnung bera chi inthliarna rawngkaia auh nawmnah tawk Vini hian amah hawtute ka hupsak nan goal khung ngei a tum dawn.

Vini hi La Liga-a goal khung hnem ber Mbappe nen an inkawp dawn. Real hi an match hnuhnung berah Benfica an hneh a, an result hi La Liga-ah chhunzawm tumin Osasuna an tlawh ang.

Hetihlai hian Barcelona tan Andreas Christensen, Gavi leh Pedri te chu inhliam vangin Levante an mikhual hunah an inlan thei dawn lo a, Manchester United aṭanga an hawh Marcus Rashford dinhmun a chiang lo bawk.

Player inhliam neuh neuh awm mah se Barca squad a chhah a, an aiawh tur player an kawl avangin table-a 19-na Levante lakah team ṭha zawk an la ni tho a, hlauhthawnna tur an nei lo.

Barca hi chak tura rin kai zawk ni mah se kar hmasaah Girona an hneh loh avangin pahnihnaah an tla a, Levante lakah pawh chesual thei an nih avangin an fimkhur a ngai dawn. Hansi Flick-a naute hian an hmelma Real Madrid chetsual hun a chân ve a ngai tawh dawn a ni.