Chelsea-in point hloh leh tawh

Premier League-ah Chelsea-in table hnuai lama awm Burnley lakah goal an khung hmasa chungin an hum zo lo a, 1-1 a inkhel a tawp avangin London club-in point hnih an hloh.

Stamford Bridge-a inkhelah Chelsea-in minute lina lekah Joao Pedro hmangin an khung a, Blues hian Clarets tlarhnung an ṭhiat nalh hle. Cole Palmer-a'n hmahruai belhchhah theihna hun a bawhpelh a, Joao Pedro-a'n a khung belh theih bawk loh avangin hun tawp lamah Blues an talbuai phah.

Minute 72-naah Wesley Fofana-a'n James Ward-Prowse a tlawh a, yellow card vawi hnihna hmuin hnawhchhuah a ni. Tun season-ah Chelsea player pariat hnawhchhuah an ni tawh a, red card vang hian tun ṭumah pawh point an hloh phahah a ngaih theih.

Stamford Bridge-a khelh ni mah se Burnley-in an tamna an hrechiang a, point hmu tumin na takin an nawr let. Injury time-ah Ward Prowse-a corner pet ṭha zet chu Zian Flemming-a'n a tauh lut a, Chelsea tan sut lehna hman a awm tawh lo a, 1-1 in inkhel a tawp.

Chelsea manager Liam Rosenior chuan, "Chak tur kan ni a, chak kan châk tawk lo a ni. A tawp kan khar ṭha tawk lo a, goal hmaah kan hlauhawm tawk lo. Match hnuhnung pahniha point li hloh tur chu kan ni lo," tiin a sawi.

Blues hian Burnley an hmachhawn hma hian Premier League-ah Leeds nen 2-2 in an inhnehtawk a, table chung bera Arsenal nen an inhmachhawn zui dawn. London club hian match 27-ah point 25 an hmu a, palinaah awm mah se zanina Manchester United-in Everton an hneh chuan panganaah an tla thla ang.