Goa leh Jamshedpur an chak

Indian Super League khelh chhunzawm zel a ni a, Zirtawpni zan khan FC Goa chuan khualmualah 2-0 in Mohammedan SC an ngam - Goan club hian match hmasa zawkah kaithar Inter Kashi an hneh zo tawh lo a, 1-1 in an draw.

Mohammedan lakah erawh thawnthu thlak danglam an duh a, an hlawhtling - minute lina lekah Pol Moreno chuan goal hmahruai a khung a, mintute 32-naah Dejan Drazic chuan penalty hmanga belhchhahin, 2-0 in Goan club an chak.

Kolkata club Mohammedan tan Lalremsanga chuan inkhel bul ṭanin, Lalthankima leh Lalngaihsaka te bench aṭangin an lut - tawnhriat nei ṭha Zodingliana Tochhawng pawh squad-ah hmuh tur a awm leh ta a, a la inlan lo thung.

FC Goa tan ṭum dang ang thoin Ayush Chhetri-a'n inkhel bul a ṭan a, bench aṭangin Daniel Lalhlimpuia a lut bawk - Serchhip forward Daniel hian ISL ṭan dawnah Goa hi a zawm a, a club thar tana a match hmasa ber a ni.

Inrinni zan ISL inkhel pakhatah Jamshedpur an chak a, Punjab FC chu 1-0 in an hneh - Vincy Barretto chuan inkhela goal awmchhun a khung a, Men of Steel hi East Bengal nen match hnih khelh tawhah an la chak ve ve.

JFC tan hian Mark Zothanpuia chuan inkhel bul a ṭan a, Punjab FC hi ISL club zinga Mizo player kawl lo pahnih zinga mi an ni thung.