Hmahruaitu Inter an sang zel

Serie A hmahruaitu Inter Milan chu table-ah an sang zel a, anmahni hnaih bertu AC Milan aiin point 10-in an sang tawh zawk. Inter hian Inrinni zan khan 2-0 in Leece an hneh a, Henrikh Mkhitaryan leh Manuel Akanji ten goal khat ve ve an khung.

Stadio Ettore Giardiniero-a inkhelah Inter-in inkhel an thunun tluan zak a, goal hmu turin nghah rei a ngai thung. Inter tan Luis Henrique, Pio Esposito leh Federico DiMarco ten chance duhawm nei mah se goal an khung thei lo vek.

Minute 73-naah goal kan hmu chauh a, DiMarco corner pet aṭanga ball per chu Mkhitaryan-a bulah tlain Armenian midfielder hian cool takin a pet goal a, Inter hma a hruaipui. Minute 82-naah DiMarco corner pet bawk chu Akanji-a'n an chak nemngheh nan a tauh lut a, mualneitu Leece-in goal an khung ve thei lo a, harsatna tawk loin khualmualah Inter an chak.

Inter tan goal khung khawl Lautaro Matinez a inlan lo a, Argentine forward hi Champions League match hnuhnung bera Bodo/Glimt an hneh loh ṭumin lakchhuah a ni a, a hliam hi serious lo mah se an match dawt leh pahnih, Genoa leh Como an inhmachhawn hunah a tel ve thei dawn lo.

Martinez hian tun season inelna hrang hrangah goal 18 a khung tawh a, a awm lo tur hi Inter tan channa lian tak a ni a, mahse rawlthar duhawm Pio Esposito, Marcus Thuram leh Ange-Yoan Bonny te an awm avangin hlauthawng tur erawh an ni lo. March 8-a Milan derby an khelh hunah a lo kir leh beisei a ni.

Cristian Chivu naute hi an point 64 hmuin hmahruaitu an nih chhunzawm zel a, an hnuai chiaha awm an hmelma AC Milan chuan pathumnaa awm Napoli nen an inhnaih tawh zawk. Milan hian nizan khan Parma an mikhual a, an result a zirin an Inter an inhtlauhna a la danglam thei thung.

Hetihlai hian Juventus chuan an mualah Cesc Fabregas-a enkawl Como 2-0 in an ngam lo a, Juve hi panganaah awm chhunzawm mahse Como nen point khat chiahin an inthlau tawh.