Metz sawptu PSG-in hmahruai leh nghal

Paris Saint Germain chuan Inrinni zan khan an mikhual Metz chu 3-0 in an sawp a, hmahruaitu RC Lens-in 3-2 a Monaco an hneh loh avangin pakhatnaah PSG an chho. PSG tan Desire Doue, Bradley Barcola leh Goncalo Ramos ten goal khat ṭheuh an khung.

Inhliam vangin Ousmane Dembele awm lo mah se PSG-in buaina an tawk lo a, minute thumna lekah Doue-a'n hmahruaina goal a khung nghal a, PSG an phur hle.

First half hun pek belhah Barcola-a'n hnai tak aṭangin a tauh lut leh a, an hmahruaina a belhchhah. Minute 77-naah Goncalo Ramos-a'n chiang takin a pet goal-in an chak nemnghehna goal a khung a, nuamsa takin PSG an chak.

Rawlthar duhawm Dro Fernandez chuan a vawi khat nan PSG tan bul a ṭan a, thla hmasa lawka Barcelona aṭanga an lakluh Fernandez a khel a hmuhnawm a, Metz player te lakah a zam lo. Kum 18 chauha upa a la nih avangin a hmabak a êng a, Luis Enrique hnuaiah hmun pawimawh chan tumin a bei chho ang.

PSG hian point 54 hmuin pakhatnaah an chho leh a, anmahni hnaih bertu Lens aiin point hnihin an sang zawk. Match khelh tur la tam mah se PSG hian league-ah champion nawn an duh chuan an chetsual a thiang tawh lo.