Zaninah Everton vs United

Manchester United-in zanin dar 1:30 hian Premier League-ah Everton an hmachhawn dawn. Nikum November thla khan Old Trafford-ah Toffees hi 1-0 in an chak a, Hill Dickinson Stadium-ah Michael Carrick leh a hote tan fimkhur a ṭul ang.

Red Devils hian Carrick-a hnuaia match li chhung an chak zawn hnuah match tawp berah West Ham United nen 1-1 in an inhnehtawk a, Hammers an hmachhawn ṭum hian inkhel chanchin ai mahin Frank Illet-a chanchin ngaihven a hlawh zawk. Illet hian United October 5, 2024 hnuah lu a met leh tawh lo a, vawiin hi ni 505 a ni.

Tun ṭumah erawh Illet-a chanchin sawi a ni tawh lo a, Carrick-a hote khelmual chhungah an insawrbing thei ang. Man United hian FA Cup khelh tur an neih loh avangin chawlh hahdam hun an nei rei bik a, Everton hma hian ni 13 an chawl.

Tlarhma lemah Benjamin Sesko-a'n match hnuhnung pathumah goal hnih a khung a, United striker hian goal a khung chhoh zel chuan starting XI a beisei ngam dawn. Tun ṭumah erawh Bryan Mbeumo, Matheus Cunha leh Amad Diallo te a nek chhuah a rinawm loh.