South Africa-in India an sawp

T20 Cricket World Cup Super 8-ah South Africa-in India 76 runs in an sawp. Men in Blue hian West Indies leh Zimbabwe te an la hmachhawn dawn a, hnehna an chan ve ve chuan semifinal kawng a la inhawng.

Narendra Modi Stadium, Ahmedabad-a inkhelah South Africa-in 187/7 runs an siam. Proteas hian bul ṭan chhe mah se Dewald Brevis (45) leh David Miller (63) ten dinhmun ṭhaah an rawn dah a, Tristan Stubbs-a'n (44) a tawp a rawn khar ṭha bawk.

India tana tun hnaia che ṭha ber Ishan Kishan-a'n run khatmah a siam lo a, Abhishek Sharma-a'n (15) beisei a la pha lo chhunzawm zel. Axar Patel aia thlan Washington Sundar-a'n beisei a pha lo a, 111 runs chauh siamin over 18.5-ah an thi fai vek.

Men in Blue hi NRR a chhiat avangin hmabak a harsa hret dawn a; February 26, Ningani zan hian Zimbabwe an hmachhawn dawn. Group 2-ah Pathianni khan England-in (146/9) inelna thlengtu Sri Lanka (95) 51 runs in an hneh a, zanin dar 7:00 hian England leh Pakistan te an inhmachhawn ang.