A chung berah Barcelona an kir

Barcelona chuan Pathianni zan khan Levante 3-0 in an hneh a, an hmelma Real Madrid lehpelin pakhatnaah an chho. Barca tan Marc Bernal, Frankie De Jong leh Fermin Lopez ten goal khat ṭheuh an khung.

Camp Nou-a inkhelah dan pangngaiin Barca-in ball an chang hnem a, an hmelma Real an chak lo tih hre chungin an inkhel mah se pressure an nei lo a, inkhel an thunun tluan zak. Minute lina lekah Eric Garcia cross chu Bernal-a'n hnai tak aṭangin a pet goal a, a team hma a hruaipui.

Mualneitu team inkhel a hmuhnawm a, chance pawh an nei hnem. Striker tawnhriat ngah Robert Lewandowski goal hmaah a hriam tawk lo a, Lewandowski hian vawi hnih lai chance ṭha a hlah a, a vanneih zan a ni lo. Minute 32-naah Joao Cancelo ball vawrh luh chu De Jong-a'n a pet goal ve lehin an hmahruaina a belhchhah a, Barca an nung hle.

Second half-ah Barca bawk an hlauhawm a, Catalan club tan Eric Garcia, Raphinha, leh Fermin Lopez ten chance duhawm an hlah vek. Mahse Barca an vanduai reng lo a, minute 82-naah corner aṭanga ball a hmuh chu Fermin-a'n box pawn aṭangin kawh takin a pet goal a, Levante keeper Mathew Ryan tan dan ngaihna a awm lo. Levante-in goal an khung ve thei lo a, nuamsa takin Barca an chak.

Barca an chak avangin table chung ber an luah leh a, an hmelma Real Madrid-in lehpel ve zawk mah se Real hi an chesual a, Barca-in Real lehpelh theihna hun ṭha an bawhpelh phal lo. Barca hian point 61 hmuin Real nen point khatin an inthlau.

Match 10 chuang khelh tur la awm mah se Barca an fimkhur a ngai a, Real-in an chetsual hun an chan leh tawh dawn avangin champion an tum a nih chuan an chetsual a thiang tawh lo. Hansi Flick-a naute hi Champions League-ah a sang pariat zinga an tel phak avangin tun thlaah match an nei dawn lo a, Real erawh naktuk zanah playuoff second leg khel turin Benfica an lo mikhual ang.