Anthony Gordon a 'luck'

Newcastle United tana che ṭha tak forward Anthony Gordon chuan duhtu a ngah a, amah duhtu zingah Liverpool leh Arsenal hming a ri telin Gordon hma hun a chiang lo.

Tun season-ah Gordon a che ṭha a, Newcastle tan inelna hrang hrangah goal 14 a khung tawh a, Champions League-ah bik match kua khelin goal 10 a khung tawh a, Harry Kane lehpelin Kylian Mbappe chiah a tluk lo.

Liverpool-in Yan Diomande duh mah se Gordon lam an hawi tak zawk a, inbiakna la awm lo mah se kum 24 mi Gordon hi Anfield lamah seng luh an duh a, Mohamed Salah thlaktu atan an duh.

Gordon duhtu zingah Manchester United pawh an lang ve a, United chuan Gordon hi nipuiah lak an duh a, Newcastle United-in season tharah Champions League an khelh dawn loh chuan a chhuah a beiseiawm niin sawi a awm bawk.

A chhuah dawn leh dawn loh chungchang an zawhna chhangin Gordon chuan,"Kei chuan engmah ka hre lo, club-in min chhuahtir an duh chuan nangni (media) aiin keimah min hrilh hmasa zawkin ka ring. Thu belhchian dawl lo mai mai a ni.

Tunah chuan kei leh ka team-ah ka insawrbing a, kan hma hun kan ngaihtuah nasat lutuk chuan kan khelh chhiat phah fo a, chutiang chu kei pawhin ka lo tih tawh avangin ka tisual nawn tawh dawn lo," a ti a, a hma hun a sawi chiang duh lo.

English forward Gordon hian January 2023 khan Everton aṭangin Newcastle hi a zawm a, Magpies tan match 142 khel tawhin goal 36 a khung tawh a, assist vawi 28 a nei tawh bawk.

Zanin dar 1:30-ah Newcatle hian Qarabag an mikhual dawn a, first leg-ah 6-1 ngawtin an chak tawh a, second leg-ah thil mak a thleng a nih loh chuan Magpies hi last 16 an lut chiang tawhah a ngaih theih. Tun UCL-a goal 10 khung tawhtu Gordon hian goal khung belh a tum dawn a, Mbappe (13) khum a tum ang.