Jokic-a'n Nuggets chakpui zo lo

NBA regular season khelh mekah nimin zing khan Denver Nuggets chuan 128-117 in Golden State Warriors an hneh lo a, Nuggets tan an thiampuipa Nikola Jokic lo kirin triple double siam mah se a team chakpui nan a tawk zo lo.

Chase Center, San Francisco-a inkhelah Jokic a langsar a, Serbian center hi hliam vanga a chawlh deuh vang vang hnuah a lo kir leh a, court chhungah a langsar nghal hle. Jokic hian point 35 leh assist 12 neiin rebound vawi 20 a la a, triple double a siam. Jokic bakah Jamal Murray (21), Christian Braun (18) leh Bruce Brown (12) te khel chhe lo mah se an vanduai ṭum an tawng a, a tlawm zawkah an ṭang.

Hetihlai hian Warriors an khel ṭha a, player pakua chiah squad-ah awm mah se pasarih ngawtin point 10 an score tling. Moses Moody-a'n score hnem berin point 23 a score a, Al Horford (22), De'Anthony Melton (20) leh Brandin Podziemski (18) ten Warriors chak nan an thawhhlawk viau bawk.

Nuggets tan Aaron Gordon a la inkhel thei lo a, Gordon tel loin Nuggets-in an nawr na tawk lo, chutihrualin Warriors tan Draymond Green leh Stephen Curry an khel bik lo a, Nikola Jokic a lo let leh tawh avangin chhuanlam a tling lo.

Warriors tan an khaipa ber Stephen Curry chu a khup hliam vangin a la inlan thei lo a, Curry hi February 19, Ningani khan Golden State chuan ni 10 hnuah a hliam endik leh a nih tur thu an sawi. American point guard Curry hian hliam vangin All Star game pawh a khel tawh lo.

Curry hma hian Jimmy Butler chu a inhliam tawh bawk a, Butler hi tun season-ah a inlan tawh dawn lo. Golden State hi Western Conference table-ah pariatnaah an awm mek a, playoff khelh an tum a nih chuan Curry a dam vat a ṭul ang.