AC Milan an chesual nawn

Serie A champion beiseitu AC Milan an chesual nawn a, Nilainia Como an inhnetawkpui hnuah Pathianni zan khan an mikhual Parma 1-0 in an hneh lo, Parma tan Mariano Troilo-a'n goal awmchhun hi a khung.

San Siro-a inkhelah mualneituin inkhel an thunun zawk a, hliam vanga a chawlh vang vang hnuah Christian Pulisic a lo kir a, goal khung lo mah se Pulisic a nung hle. Tun season Serie A-a goal riat khung tawh Pulisic hi a vanneih zan ni se hattrick a siam thei hial ang.

Pulisic bakah Rafael Leao leh Alexis Saelemaekers ten an chance neih an chhawr ṭangkai thei lo a, Milan player te goal hmaa an hriam tawk loh bakah Parma an vannei ve bawk a, an keeper Edoardo Corvi-a'n vawi tam a chhanhim.

Team pahnihten point an insem dawnin a lang hman a, minute 80-naah Parma defender Mariano Troilo-a'n corner aṭangin a tauh goal a, Parma chakna goal a khung. Troilo goal khung danah foul a awm deuhin a lang a, VAR ennawn a nih hnuah pawm tlang a ni thung. Milan tan Niclas Fullkrug-a'n an siphurh sut theihna chance nei mah se goal zawnah a pet thei lo a, hun tawp zuiin an mualah Milan an tlawm.

Milan hi an chak loh avangin khelh zat inangah an hmelma Inter Milan chu point 10 laiin an pha tawh lo a, champion tur chuan an chetsual loh bakah Inter chetsual hun an chan a ngai tawh dawn. March 8-ah Milan Derby khelh a ni dawn a, boruak a sang viau a beiseiawm.

Inkhel dangah Roma chuan an mikhual Cremonese chu 3-0 in an hneh a, Roma tan Bryan Cristante, Evan Ndicka leh Niccolo Pisilli ten goal khat ṭheuh an khung. Roma hi palinaah awm chhunzawm zelin an chung chiaha awm Napoli nen an point hmuh zat a inang tawh.

Napoli hian Pathianni zan vek hian an mikhualna ramah Atalanta 2-1 in an ngam lo a, Napoli-in Sam Beukema hmangin goal khung hmasa mah se Atalanta-in Mario Pasalic leh Lazar Samardzic te hmangin an lehthal.