Inter an tho chhuak thei dawn em ?

Italian club lian Inter Milan chuan zaninah Champions League match an khel dawn a, last 16 playoff first leg-a 3-1 an hneh loh Bodo/Glimt an mikhual dawn. Inter hi dinhmun chhe zawkah awm mah se beisei a la bo bik lo a, San Siro a khel tur an nih avangin Norweigian club hi lehthal an tum dawn.

Tun season Champions League-ah beisei phak bakin Bodo/Glimt an che ṭha a, tla thei dinhmuna an din hnuah league round match hnuhnung pahnihah Manchester City leh Atletico Madrid te an hneh a, playoff khel turin an inpet tling.

Bodo/Glimt an vanneih bakah an huaisen a, playoff first leg-ah Inter hi 3-1 in an hneh a; Sondre Brunstad Fet, Jens Petter Hauge, Kasper Hogh ten goal khat ṭheuh an khung. Inter tan Pio Esposito-a'n beiseina siamsakin goal khat a khung ve bawk.

Inter tan an captain leh goal khung khawl Lautaro Martinez a inlan thei dawn lo a, Argentine forward hi first leg-ah khan a chawn hliam vangin lakchhuah a ni a, a hliam hi 'serious' lo mah se Bodo bakah Genoa leh Como a hmachhawn thei dawn lo a, March 8-a Milan derby an khelh hunah a lo kir thei chauh dawn.

Martinez awm lo tur hi Inter tan channa nasa tak tling mah se Pio Esposito a awm a, Italian rawlthar hian theihna sang tak a nei tih Serie A leh UCL lamah a lantir tawh a, a kawppui turin Marcus Thuram leh Ange-Yoan Bonny te an awm bawk a, Serie A match hnuhnung berah an chak bawk avangin inringtawk takin Bodo/Glimt an lo mikhual ang.

Bodo tan Kasper Hogh chu an innghahna a ni leh dawn a, Danish forward Hogh hian tun season UCL-ah goal nga a khung tawh a, Norweigian League (Eliteserien)-ah pawh goal 17 lai a khung tawh. First leg-a Inter an mikhual ṭumin goal a khung bakah assist a nei tel a, Inter tan zuam a thiang tawh lo.

Hogh thlawp turin Jens Petter Hauge a awm leh dawn a, AC Milan tan pawha khel tawh Hauge hi first leg-ah pawh a khel ṭha hle a, goal a khung bakah Inter tlarhnung tan a hnawksak a, Inter laka thilmak thlen nawntir turin theihna sang tak a nei a ni.

Chutihrualin Bodo/Glimt hi khualmuala khel tur an ni a, Italy-a stadium lian berah an khel dawn a, an khelmual Aspmyra Stadion, entu 8,270 chauh lenna nen chuan a inthlau mai thei. Mahse khualmuala Atletico Madrid hneh theitu an nih avangin an hlauhthawn a rinawm lo a, inkhel hmuhnawm a beisei ngam.