Pacman leh Mayweather inhnek leh dawn

Boxing khawvela chanchin ngah pahnih leh mipui ngaihven hlawh, Manny Pacquiao leh Floyd Mayweather te chuan September-a inhnek turin inremna an nei a, a vawi hnih nan boxer ropui pahnih an intawng dawn.

Hetihrual hian boxer pahnih hi an kum a tam ve deuh tawh a, an intawn hmasak ang chuan boruak a sang thei tawh kher lo ang - Pacman hi kum 47 mi niin, Mayweather hi kum 48 mi a ni tawh thung a, boxer pahnih inhmachhawn lai hi Netflix chuan live-a en theih turin a pe chhuak ang.

Kar hmasa khan Mayweather hian boxing khel tura a lo kir leh tur thu a sawi a, kum 2017 hnua ring chhung a luh leh hmasak ber tur a ni - a inhnek hnuhnung berah khan UFC fighter boruak nei lian Conor McGregor a hmachhawn a, round 10-naah technical knockout hmangin a hneh.

Filipino boxer ropui Pacquiao hian kum 2021 khan politics lama insawrbing turin inhnek a chawlhsan thung a, mahse, nikum July khan ring chhungah lo kir lehin, WBC welterweight champion Mario Barrios a hmachhawn a, chak zawk awm loin an in draw.

Mayweather leh Pacquiao hi kum 2015 khan a vawi khat nan an lo intawng tawh a, 'Fight of the Century' tih hiala sawi niin, sum pawh an la lut hnem - tun ṭum an inhnek tur pawhin ngaihven a hlawh a, an vanglai ang erawhin sum an la lut kherin a rinawm tawh lo.

Boxer pahnih intawn hmasakah khan Mayweather hi unanimous decision-a chak zawkah puan a ni a, Las Vegas-a an inhnek result hi Pacquiao fans tam takin pawm an harsat thung - kum 2026-ah rematch an nei leh dawn ta!

Hetihrual hian boxer pahnih kum a tam deuh tawh avangin round eng zat nge an inhnek dawn, tih sawi a la awm rih lo a, eng weight class-ah nge an inhmachhawn ang tih pawh sawi chian a la awm lo.

Pacquiao chuan, "Floyd nen hian boxing khawvela fight ropui ber chu kan fan-te kan lo hlui tawh a, rei tak chhung rematch kan neih leh hun an nghak tawh - he fight en hi fan-ten an phu a ni," a ti.

Weight class hrang hrang pariata world title 12 hlawh chhuak thei Pacman chuan, "Floyd hi a professional career-ah vawi khat tal tlawm ve se ka duh a, chu result chu tuin nge pe hre reng se ka duh," a ti.

Mayweather pawh a zam duh bik lo. American boxer chuan, "Manny hi ka lo hmachhawn tawh a, ka hneh tawh bawk - result danglam a awm lo ang," a ti a, a hneh tawh hnu laka tlawm a tum bik lo.

Kum 2015-a boxer pahnih an inhmachhawn ṭum khan pay-per-view ah maktaduai 4.6 zet an hralh thei a, MGM Grand Arena-a an inhnek en man gate ticke aṭang ringawtin dollar maktaduai 72 an la lut thei bawk!

Mayweather hian kum 2017-a inhnek a chawlhsan hnuah exhibition match a khel nual a, Mike Tyson pawh hmachhawn turin ruahmanna kalpui mek a ni.