Silly Point : T20 World Cup Lamtluang

Politics leh ṭhenawm innghirhona avanga khelmual pawn lam boruak lum takin tournament ṭan hma ngawt aṭanga boruak luahtu a nih hnuah, harsatna lian tham em em awm loin ICC T20 World Cup chu khelh chhunzawm mek zel a ni.

World Cup khelh mek laiin BCCI Women Senior Inter Zonal khelh turah North East aiawhin kan Mizo nula pahnih thlan an nih bakah coaching staff zingah Simon Lalramchhana ( Zarkawt) an tel tur te hi Mizoram cricket-in hma a sawn tichiangtu kan ti thei ang.

CYMA Inter Branch Cricket 2026 inelna kan hma lawka awm tur atan Branch YMA hrang hrang an inpuahchah mup mup bakah, Local Cricket a inelna sang ber 1st Division Mahuma Memorial League chu Sihhmui Cricket Stadium lamah nitin mai inkhel hmuhnawm min hlui bawk a ni.

World Cup lam

Ram 20 inelna, India leh Sri Lanka ramten an thlen ṭawm ICC T20 World Cup 2026 chu team riat chiah damna Super 8 league-ah an inthlifim ta a. Cricket ram ropui Australia group stage paltlang zo lo te leh cricket vanga hriat ngai loh ram Italy-in khawvel mipui ṭan an hlawh dan te chu chanchin ngaihnawm a tling.

USA lamah cricket hi sap leh vun ngo tak chuan khel tam lo mah se, hma an sawn ve zel tih a hmuh theih. T20 batter ranking no. 1 Abhishek Sharma-a'n group stage a run a siam miah lote chuan sawizui a hlawh viau bawk.

Super 8 ah Super Man

Group 2 lamah nizan England leh Pakistan inkhelh leh zanin New Zealand leh thlengtu branch Sri Lanka inkhel a zirin semifinal lut tur an chiang deuh uarh tawh dawn a. Team inkhel mah nise, mimal pakhat hian cricket game ah hian team hi a chakpui tlat theih miau avangin tun World Cup-ah chuan Shimron Hetmyer (West Indies), Pathum Nissanka (Sri Lanka) leh Aiden Markram (South Africa) te hi Superman chu an la ni deuh ber hrih mai awm e.

Ahmedabad Anchhia

Hamara Desh Stadium chhuanvawr mipui nuai chuang len theihna Narendra Modi Stadium, Ahmedabad khuaa mi hi BCCI hian inkhel pawimawh leh final te nghah nan hmang foin, Eden Gardens, Wankhede tih sakhming aiin tihlar han tum viau mah se, he khelmual hi India cricket team te lei rem la rah hleitheih lohna leh anchhia a nihna hmun a ni deuh tlat.

ICC World Cup 2023 final- a Australia laka an mualpho hnuah, India chu tun T20 World Cup aṭanga bedding tel thei dinhmunah an ding ta tlat mai. Pathianin zan khan Men in Blue hi South Africa lakah dawl zawrin an zawr a, an khelh hmabak chak ve ve pawhin tla thei an ni.

Quo Vadis Pu Gambhir leh a naute?

Naktuk Ningani zan Chennai lamah Zimbabwe nen an intum hunah chak satliah mai a tawk dawn lo a, hnehsawh taka run rate kang zawt khawpa an sawp a ṭul dawn. Chiang taka an chak a nih loh chuan Bye Bye India tih hi kan thunawn a nih mai hmel ta riau a, Suryakumar Yadav-a hote hian semifinal an thleng pha lo a nih chuan Bangladesh mipui lawmah erawh a tla ngei ang le...