Vawiinah MFA Cup semifinal

MFA Cup semifinal vawiin hian C. Ṭhuamluaia Mual, Lungleiah khelh a ni dawn. Chawhma dar 11:00-ah Siaha club Meisatla FC leh Hnahthial club Lungleng FC te an inkhel ang a, chawhnu dar 2:00-ah Aizawl FC Academy leh champion lai Electric Veng FC (Kolasib) te an inkhel ang.

Meisatla FC-ah hian MPL hnuhnung bera hmin rawn chher HC Willis Byhna te an awm a, Lungleng FC lamah hian CYMA Football 2025 best player Lalnunzira (Zirtea) te an awm thung. Team pahnih hi intluk tawk viau tura ngaih a ni.

Semifinal hnuhnung zawka khel tur Aizawl FC Academy hi AFC A licence coach Samuel Lalrinngheta Fanai hnuaia khel an nih bakah team anga awm ho rei tawh an ni a, an kum naupan anga en chi an ni lo. Champion lai Electric Veng erawh champion nawn tumin squad an inla chhah ṭha a, MPL-a tawnhriat nei ṭha Lalthanpuia'n (Tepuia) leh C. Lalthlanawma te an kawl avangin chak tura rinkai zawk an ni hial ang.