F1 car thar khalh nuam titu Hamilton

British racing driver Lewis Hamilton chuan F1-in car thar an duan chu khalh nuam a tih thu a sawi a, rules thar chungchanga Max Verstappen leh Fernando Alonso te ngaihdan a ṭawmpui lo. F1 hi FIA-in a lo tih ṭhin danin car regulations a thlak thar kum a ni a, 2026- a hman ṭan turin car bakah engine, ke size thar leh wing zawng zawng a tharin an thlak vek.

Dutch driver Max Verstappen chuan engine tharin mamawh a ngah ta lutuk chu a lo sawisel tawh a, Verstappen bakah hian driver hrang hrangin F1 rules thar hi an lo sawisel nual tawh. Hetiang karah hian Ferari driver Hamilton chuan khalh nuam a ti zawk a, car-in thli a dawl theih dan an siam thar te chu ṭha a tih zawk.

Kum 41 mi Hamilton chuan,"Thil thar kan la hriat loh tam tak a awm a, a hmasa a mi nen a danglam avangin a harsa deuh maithei, mahse keichuan a nuam ka tihna a bo phah chuang lo. Car te hi khalh a nuam sawtin ka hria a, car hmaasa ho aiin control an nuam zawk," a ti.

Hamilton bakah Mercedes driver George Russel pawh rules thar duhtu zingah a tel a, Verstappen nen inel a chak thu a lo sawi tawh. Russel chuan, "Tunah chuan team zawng zawngin engine an nei ṭha tawh a, chuvangin Max (Verstappen) pawh a phur sawtin ka ring a, ani nen inel ka châk tawh hle," tiin F1 thil thlak danglam chuan a tiphur hle.