Barcelona-in Ajay-a an la lut

Spanish La Liga hmahruaitu Barcelona chuan Norwich City rawlthar duhawm Ajay Tavares an la lut - a hming en mai chuan Tavares hi Indian thisen kai a ni em? tih mai a awl a, tuna kan hriat chinah erawh Portuguese leh English mi nihna nei kawp a ni thung.

Kum 16 mi Tavares hian senior team tan match khelh la nei miah lo mah se, Norwich academy player zingah chuan beiseiawm ber pawl a ni a, European club tam takin an club-a khel tura an hel lai a ni.

A tawpah chuan Barcelona-in an chang a, Norwich City chuan English forward an chhuahtir manah zângnadawmna an dawng ve leh thung dawn - eng zat chiah nge an dawn tur erawh tarlan a awm lo thung.

Norwich sporting director Ben Knapper chuan, "Kan academy player naupang tak, talent nei ṭha ni bawk si Ajay kan chhuahtir a ngaih avangin hrehawm ti mah ila, kan inchhuang em em thung lawi si a ni," a ti a, Barca lakluh tak an player chu a fak.

Knapper chuan sawi zawmin, "Ajay-a hmasawnna hi chu academy-a amah enkawltu leh kaihruaitute zawng zawng hmalakna zar a ni a, khawvela football club ropui ber pawl leh academy ṭha ber pawl a zawm thei tur hi kan chhuang hle a ni," a ti a, an player chu an lawmpui thiam hle.

Tavares hi international football-ah chuan England leh Portugal tan inlan thei mah se, age level-ah chuan England tana inlan a thlang a, Three Lions Under-15, U16 leh U17 tan a khel tawh.

English midfielder beiseiawmin Barca a pan a, mahse, a kum a nau deuh avangin phur hluai a la hun lo. Kum 2019 khan Louie Barry chuan West Bromwich Albion aṭangin Barca hi a zawm a, mahse, a kum lehah Aston Villa chuan euro maktaduai khat bawr velin an lei.

Mahse, Barry hian Ipswich Town, Swindon Town, MK Dons, Salford City, Hull City, Sheffield United leh Stockport County-ah te loan-in a khel tawh a, League One club Stockport-ah hian la khel mekin, loan-a vawi thum a khelhna chiah a ni!

Kum 2019 vek khan Barcelona hian Arsenal aṭangin rawlthar beiseiawm, kum 18 mi Marcus McGuane an la lut a, reserve team-ah khelhtir phawtin, an beisei a phak loh hnuah, kum 2020 khan England-ah a kir a, Nottingham Forest a zawm!

Forest tana a khelh hnuah English club tenau Oxford United, Bristol City leh Huddersfield Town tan a khel leh tawh a, beisei ang chu a ni zui lo chiang hle.