Loftus-Cheek a chawl rei dawn

AC Milan midfielder Reuben Loftus-Cheek chu a khabe ruh a tihtliah avangin kar riat chhung a chawl dawn a, World Cup khelh a beiseina thamralah a ngaih theih.

Loftus Cheek hi Pathianni zana Parma nen an hneh loh ṭumin khan Parma keeper Edoardo Corvi nen an intauh palh a, a khabe ruh a tliakin zawn chhuah a ngai hial.

AC Milan chuan,"Loftus-Cheek hian hliam na tak a tuar a, a pawi kan ti hle. Hlawhtling taka zai a ni tawh a, tunah chuan hospital aṭangin lakchhuah a ni leh tawh," tiin thuchhuah an siam.

Kum 30 mi Loftus-Cheek pawhin,"Min enkawltu medical staff te chungah lawmthu ka sawi a, min buaipui danah an professional-in an hna an hnehsawh hle. Fans te chungah pawh ka lawm a, min support-na leh min ngaihpawimawhna thu min thawn zawng zawngte avangin ka lawm e," tiin IG lamah lawmthu a sawi.

Chelsea midfielder hlui hi kum sarih zet ram tan a inlan tawh loh hnuah nikum October-ah khan Thomas Tuchel-a'n a ko a, Wales lakah bench aṭangin a lut. Loftus-Cheek hian kumin June-a khelh tur World Cup-ah ram tan inlan leh tumin beiseina sang tak nei mah se a khelh a rinawm tawh loh.